كنت ولا زلت أتعجب من هؤلاء الذين يستخدمون الإنجليزية في مراسلتهم لاقتناعي الخاص إنه من الصعب التعبير عما بداخلى بلغة أخرى غير لغتى العربية فوقع الكلمه بلغتى الأم مختلف تماماً عن وقع نفس الكلمه بنفس المعنى في لغة أخرى. فمثلاً إذا قلت (وحشتنى) فهي في نظري أعمق وأكثر تعبيراً من أن أقول (I miss you) وكلمة (باحبك) تمس القلب ويقشعر لها البدن أكثر من كلمة (I love you) وكما أثرت لغتي العربية على كتاباتي فقد أثرت ايضاً على استماعي للأغاني فكل حاله لها أغنية عربية تحملني معها لعالم أخر بعيد عن عالمنا هذا. أما الأغاني الغربية يقتصر استمتاعي بها على موسيقاها فالموسيقى هى لغة عالمية لغة لا تحمل أحرف. لغة لا تحمل الا أوتار الروح ومفاتيح القلوب. 

وإذا قلنا إن العربية هي حديث قلبي. فاللغة العامية هى الأكثر والأقرب لحوار الروح لذا سأكتب لأول مره بالعامية. ايوا حاكتب بالعامية عشان اعبر من غير لا قواعد ولا روابط ولا قيود بكلام يخرج من القلب وأتمنى انه يكون من القلب للقلب. 

سؤال بردده كتير قوى ويمكن كتير منكم بيرددوه زيي "هو فيه ايه؟" "هي الدنيا جرى لها ايه!!!؟" الدنيا بقت وحشه والا الناس بقت وحشه والا الظروف حولت ناس كتير وخلتهم وحشين والا احنا كمان من الوحشين بس مبنشوفشى الوحش اللى جوانا وبقينا بس بنعد ع الناس الوحش اللي جواها.

احنا اللي كبرنا وابتدينا نحس بصعوبة الحياة. بقينا بنتوجع قوى من أي حاجه وكل حاجه مهما كانت بسيطه والا مافيش حاجه بسيطه وكله بقي فوق مستوى طاقتنا واحتمالنا.

احنا اقوياء وشيلنا كتير بس تعبنا قوى من كتر الشيل وخلاص مبقاش فيه حيل نشيل تانى. احنا جبل ما يهزه ريح والا احنا جمل ونخ. احنا هشين وكنا عاملين فيها اقويا والزمن والأيام ورتنا نفسنا على حقيقتها. والا احنا أضعف من اننا نشيل اى حاجه أصلا. بجد هو فيه ايه؟؟!! ويا ترى حنكمل كدا. طب وحنعرف نكمل والا حنقع ولو وقعنا فيه حد حيجى يسند، والا السند كمان نخ. والا اصلا مافيش سند والكلمه وهم وخيال زى كلام كتير قوى اتربينا عليه وبقي موضه قديمه راحت وراحت أيامه او بقي كلام بلدى وبيئه خليكوا فريش.

طبعا مش حتكلم عن ربنا سبحانه وتعالى وأقول إنه هو السند وهو الحل لان دا طبعا كلام مفروغ منه وحقيقة غير قابلة للجدل لكن اعتقد ان كتير منا ان مكانشى معظمنا مهما كانت درجه قربهم من ربنا ومهما كان يقينهم ثابت ان ربنا هو المخرج وهو الحل برضه محتاجين حد كويس ع الارض حد مننا نلجا له حد نرمى عليه الحمول من وقت للتاني حد يطبطب. والا ايه. طب فعلا حنلاقيه والا الكل تعبان والدنيا استهلكته زيادة عن اللزوم بدرجه شلت روحه وإيديه حتى عن الطبطبه على غيره.

ما هو المقوله السايده دلوقتى وبقت على لسان الكل. محدش مرتاح. هو فعلا مافيش مرتاحين والا الكل ما بقاش يشوف جواه وحواليه غير السواد. كلنا عندنا مشاكل وكل واحد شايف مشكلته هي الاصعب وهي ازمه الكون ومحدش بيبص ل بلاوى الناس عشان تهون عليه بلوته.. طب دا عدم رضا والرضا بقي كلمه بنقولها من برا بس لكن من جوانا هي مش موجودة اصلا.

(الحمد لله) كلمه شفايفنا بتقولها لكن قلوبنا نسياها لدرجه ان كتير بقوا يقولوها ب ململه مصاحبه بعوجه في الوش ومعقوبه بتنهيدة. والا احنا راضيين بس تعبانين من الشيله والضهر انحنى وقرب يتقطم وبقينا نقول ال(اى) كتير قوى لدرجه اننا مش قادرين نتكلم ولا نقول غيرها من تقل الحمل وحتى السكوت ما بقيناش قادرين عليه. هو لِيه كلنا عاوزين نصرخ بعزم ما فينا!!!؟؟ دا انا سمعت عن شباب عاملين مشروع عباره عن اوضه عازله للصوت تدفع وتدخل تصرخ جواها من غير ما حد يسمعك. واللى كتير من اللى حيقروا الجمله دى دلوقتى اول حاجه خطرت فى بالهم المكان دا فين؟؟ واروحله أزاي انا محتاج اروح جدا. زي الغريق اللي بيتعلق بقشايه. فاكرين لما نصرخ اللي جوانا حيخلص ونرتاح. هي نغمة الشكوى السايده والكلام فى المشاكل صرخه برضه بقينا بنصرخها طول الوقت. بقت هي لسان حالنا كلنا؟؟!! والا فيه منا صوته أتنبح وفقد الأمل ومبقاش حتى الشكوى قادر عليها.

أدعية فك الكرب وأوردة النجاة والخلاص من احوال الدنيا بقت أكثر شهره وترديد من أدعية الشكر والتقرب لله والخلاص من النار ودخول الجنه. الناس بقت حافظه اسامى المهدئات (الجدول وغيره) عن ظهر قلب. الدكاتره النفسيين شغالين الله ينور ما شاء الله. دا غير الروحانيين واللجوء ليهم. احنا مستعدين ندفع اى حاجه فى مقابل اننا نرتاح. ومحدش مرتاح. دا حتى اغانى الندب والولولة بقي سوقها ماشى اكتر من غيرها، او بقي العكس تماما اغانى الهلس ما هو مارتحناش يبقى ننسى ونتلهى ونسمع اللى يلغى عقولنا ويخرجنا من اللى احنا فيه اهو يمكن واحنا بنسمع نهز لنا هزتين. نرقص ونشهيص وكأن ما فيش حاجه. نعمل نفسنا ولو لوقت قصير مش واخدين بالنا. يمكن نرتاح، ومحدش مرتاح. وبرضه مش حتكلم عن حاجات تانيه برضه بقينا نعملها. بلاوى. بنضرب بيها الدنيا صرمه زى ما بيقولوا. اهو نعيش خلى الموجه تاخدنا يمكن نرتاح، ومحدش مرتاح.

طب هو فيه مشكلة؟؟!! وإلا احنا كبشر بقينا بنستحلى العذاب وبنجلد نفسنا بنفسنا. ممكن يكون ربنا سبحانه وتعالى سلط علينا روحنا تعذبنا عشان احنا بعيد قوى عنه؟؟!! والا يكونشى ما عندناش مشاكل كبيره ومصايب مش قادرين عليها ونكون بس مستحلين الهروب والبلاوي اللي بنعملها وبنوجد لنفسنا مبررات. غصب عننا والله ما احنا محتاجين نغير وننسى ونتلهى عشان عندنا وعندنا وعندنا. هى البيضة والا الفرخه!!!! هو محدش مات. عايشين اهو ومكملين يعنى قادرين. والا مش قادرين بس مكملين بأى طريقه والسلام. مكملين من غير روح. من غير حياة. انا طولت عليكم فى الولولة لانى زيكم ومعاكم فى كل اللي أتعمل واللي لِسَّه بيتعمل من غير ما الاقى اجابه. هو فيه إيه؟؟؟؟!!! 

بس يمكن من كتر ما سألت ومن غير ما افهم حاولت الاقى الحل. حاولت اشوف نور بدل السواد اى نقطه نور ترد فيا الروح. زرعت بقدونس. والله العظيم زرعت بقدونس. لما الدنيا اسودت قوى. قلت افرح. ابدر بذره تشق قلب السواد وتطرح خضار. انا بافرح قوى ومن قلبى لما اشوف زرع بيكبر. نزلت ودورت على أي حاجه ازرعها ولما نويت النية ربنا يسرها لقيت نفسي بالصدفة عند العطار باشترى حاجات للبيت ولقيته معلق ورقه فيها بذور بقدونس. اشتريتها وجريت ع البيت حطيت البذره فى قلب السواد وفضلت أرويها كل يوم بحب وبأمل وباقول يارب افرح. قعدت ايام كتيير ومافيش فايده السواد هو هو.

جريت ع النت اقرأ واكتشفت أنى زرعتها غلط. وكان فيه حاجات لازم اعملها الاول عشان البذره تطرح. هو مافيش فايده؟؟!! لا بقي، دى الأمل، لو طرحت حياتى حتتغير. فضلت أرويها كل يوم وباقول يارب لو طرحت يبقى حياتى كلها حيطرح فيها النور. يارب. والله كريم بعد شهر اتشق قلب السواد بفتوته خضار. ردت فيا الروح وجريت لكل القريبين منى أقولهم البقدونس طلع. البقدونس طلع. قالولى مبروك باستهتار قوى. عادى يعنى زرعتى بقدونس وطلع، لا مش عادى.  بيني وبين نفسي وبين ربنا سبحانه وتعالى قلت ان الزرعه دى هى انا لو قدرت تعملها تتولد وتخضر انا كمان حاتولد من جديد. حاخضر. لما طرحت قلت من جوايا بجد ومن قلبي الحمد لله. برضا حقيقى وسعاده متتوصفش. سعيت للرضا قام ربنا رضانى. 

باقولكم ايه ازرعوا السعادة. دوروا على اى حاجه تبدر جواكم الرضا وتخضر قلوبكم. أي حاجه، حتى لو صغيره وبسيطة فى نظر ناس تانيه بس بالنسبالكم حترد فيكم الروح بجد. حتريحكم بجد. ولو ملقيتوش بس إنتوا اكيد حتلاقوا. ازرعوا بقدونس.