مقالات
الصاحب رزق ياصاحبي يا يكون مجدع يا لئيم
واللي أنا هحكيلك عنهم هم صحابي الأنتيم
أصحاب بيخلوا الدنيا تبقى سعادة ونعيم
لو جوه القلب شروخ يعملوا للروح ترميم
أصحاب ليهم من قلبي كل تحية وتعظيم
فيهم اللي فكاهي وساخر واللي عميق قوي وحكيم
وده يحكي تاريخ أجدادنا والصوت عاقل ورخيم
وده جايلك مالمستقبل وتحس كلامه تنجيم
وده أستاذ فالعلاقات وبعلم النفس عليم
وده دكتور فالأديان والتحليل والتحريم
صحبة تآنس وتشرف وكلامهم كله فخيم
هديك عن بعض كلامهم نبذة وحبة تعاليم
قالوا فسعيك فالدنيا خليك فالحق زعيم
شغل عقلك هتميز بين فكر سليم و عقيم
ولا تخذل حد احتاجلك ولا تكسر قلب يتيم
لو تغلط توب واستغفر .. دي العبرة بالخواتيم
أصحابي دول أنت عارفهم ركز متكونش غشيم
كتبي .. موضوع قصتنا .. هم صحابي الأنتيم
كتبي يستاهلم مني شعر وغنوة وتكريم
كتبي وجودهم فحياتي منحة من رب عظيم
وياهم همشي طريقي علشان انا حلمي عظيم
بحلم أخويا الإنسان يحيا معزز وكريم
وأنا هفضل أطارد لحلمي لحد مقابل وجه كريم
متابعين
تابع آخر أخبارنا على أخبار غوغول نيوز
التعليقات