أحبائى أطفال شوارع مصر

تحياتى لكم جميعاً وبعد،،

أنا عارف إن الحياة فى شوارع مصر أصبحت لا تطاق، تراب وعفرة وبرد قارس، وحر قارس برضه ، يعنى حياة كرب خالص، أنتوا إيه اللى زانقكوا على كده، أنا عندى فكرة هايلة، أنا عايزكم تركبوا مركب من على سواحل مصر أو ليبيا ، صحيح المراكب دى صغيرة ومتهالكة وغير صالحة للاستخدام الآدمى، وأنها معمولة علشان تبحر قرب الشواطئ ، يعنى عمرها ما عدت بحار، والمركب يسع حوالى ١٥ شخص فقط، ولكن إن شاء الله سيحشروا ٢٥٠ منكم فى المركب وكلكم هتسافروا باذن الله، هى زنقة صحيح ولكن ما باليد حيلة، وأهو أحسن وأضمن من العوم .

علشان أنا راجل دوغرى، فأنا لازم أقولكم على كل شئ : ٨٠ ٪؜ منكم ها يغرق وراح تأكلهم أسماك القرش، وطب وإيه يعنى ماهو انتم زى ما اتفقنا عايشين عيشة كرب، والكل بيتشائم لما يشوفكوا، والجماعه بتوع السياحه قرفانين منكم وبيقولوا ؛ السياحة فى مصر اتضربت خالص من تحت رأس مناظيركم إلى بتقرٌف السياح، ومش مستحملين أى حد يجيب سيرتكم قدامهم .

يعنى وبصراحة كده لو عرفتم تغرقوا كلكم مع بعض يبقى خير وبركة واستريحتم وريحتم، ويعنى على الأقل أخذتم ثواب الجماعة. وعشرين فى المائة منكم هايوصل إلى الشواطئ الإيطالية، وهناك ستجد البوليس الإيطالى المفتول العضلات فى انتظاركم على الشاطئ وتبدأ شوية أسئلة رخمة، بس إنتم لازم تستعبطوا خالص، وكل سؤال تردوا عليه بكلمة "بامبينو" يعنى أنا طفل، فمثلاً لما يسألك اسمك إيه قوله "بامبينو"، طيب اسم أبوك إيه قوله "بامبينو"، طيب اسم أمك إيه قوله "بامبينو" وبلاش قلة الأدب دى وأوعى تجيب سيرة أمى على لسانك تانى، حتى لو سألك مقاس جزمتك كام قوله "بامبينو" برضه، ولما العساكر الطليانية مفتولى العضلات يزهقوا منكم سيطلبـون بعـض المتـرجمين المتحدثين للغة العربية، برضه استعبط فيها وقول إنك موش فاهم اللهجة لأن أغلبهم من الجزائر والمغرب، ولازم تنتهزوا فرصة إن القانون هناك فى أوروبا ما يرجعش حد أقل من ١٨ سنة ويبقى كده ضمنتم العيشة السعيدة فى شوارع أوروبا الحبيبة.

بعد كده هيحطوكوا فى مراكز ايواء فيها أكل وشرب وتكييف وكل حاجة، وطبعاً انتم تباتوا فيها ليلتين أو ثلاثة وبالليل تهربوا وتعيشوا فى شوارع إيطاليا الفسيحة معززين مكرمين، وطبعاً إذا لم تعجبكم إيطاليا ممكن تتنقلوا لكل دول أوروبا عن طريق القطار نظام التسطيح طبعاً، وأنتم أساتذة فى الموضوع ده، واللى فيكم جايب غيارات داخلية ثقيلة ممكن يتكل على الله ويطلع على الشمال وتبقوا أطفال شوارع السويد أو النرويج أو الدنمارك أو فنلندا يعنى أطفال شوارع اسكندنافية ، أما إذا كنتم لابسين غيارات داخلية خفيفة أو بدون غيارات داخلية خالص يعنى جايين أوروبا زلط ملط، فالنصحية إنكم تخليكم فى جنوب أوروبا وتعيشوا أطفال شوارع إيطاليا أو اليونان أو فرنسا، وبكده يبقى تخلصنا منكم ومن مشكلة أطفال الشوارع إلى الأبد، وتبدأوا حياتكم الكريمة فى شوارع أوروبا النظيفة اللطيفة، وإياكم يا أولاد من الكسل لأن أوروبا لا تحب الكسلانين لأن اليد البطالة نجسة، ومفيش عيب من العمل الشريف فى شوارع أوروبا مثل السرقة أو البلطجة أو الدعارة، وافرحى يامصر لأن أطفال شوارعك أصبحوا أطفال شوارع أوروبا.

والسلام ختام وأنا على علم اليقين أنه فى خلال سنة أو إثنين هانشوفكوا رافعين رؤسنا فى شوارع لندن وباريس وروما وبون وفرانكفورت وكل شوارع الدول الأوروبية الشقيقة.