لما تصحا الصبح وتبدأ يوم جديد، خليك حريص متنَمْش بنفس الدماغ الليى صحيت بيها، لازم كل يوم تضيف لنفسك سعادات وتجارب وخبرات، واجب عليك تتعلم كل يوم حاجة، أنت هتبقى المحصلة الحلوة لإضافة كل يوم.

اوعى تعيش في الدنيا تأكل وتشرب، تتجوز وتخلف وتشتغل وتموت، هتبقى ظلمت نفسك، كل ده لازم يتحس ويتعاش، متخليش الدنيا في عينك من غير طعم؛ زي ما بتحزن في الوجع دوق الفرح لما يجيلك.

استثمر أفراحك وامحي ذاكرة أحزانك.

خَلِّد ذكرياتك الحلوة في قلبك وانفض غبار الأيام عنها بإحيائها في قلبك.

أنت كده ولا كده عايش ومش عارف امتى حتموت.. صح.. طيب إيه رأيك تنبسط؟

ليه لأ، أصلها في إيدك، ابتدي بنفسك؛ حبها ودلّعها، شيلاك سنين وأنت طاحنها معاك، شوف طلباتها وابتدي بيها؛ هتلين معاك، وحتشوف منظور للحياة معداش عليك قبل كده.

أنت كده كده هتعيش مرة واحدة؛ خليها بسعادة وفي زيادة. أنت صانع البهجة في أيامك، أنت دينامو الحركة المفرحة على أوتار عمرك.

احبس في قلبك الذكريات الحلوة، خَزِنها جواك وامتلئ بأدائها. محدش في الدنيا هيخليك سعيد غير واحد بس.. أنت.

بإيدك أفراحك وخيباتك، عيشها مريحة متقفش على وجعك؛ عدي عليه ومطولش، زي ما ربنا خلق لنا الابتلاء خلق معاه النجاح والمثابرة وطّعَمْهم بالأمل. أنت مقدار الفرح اللي قررت توهبه لنفسك، شوف روحك عزيزة عليك أد إيه وعلى قد قدرها عندك ترويها.

الحياة مش هتقف عند حد ولا بعده، بس هتقف لو فضلت أنت مكانك لو بطلت تتحرك وتتقدم وتسعى.

سعادتك متوقفة على مقدار السعي والأهداف اللي بتحطها لنفسك. زود تِسعد.

حقيقي باستغرب ناس بتلف وتدور ساعية ورا النكد والنواقص.

لو حياتك مُحزنة، اتعوّد تغيير الشباك. إزاي يعنى؟ أقصد البلكونة اللي أنت واقف فيها مطلّها وحش. غيرَّ العتبة، غيرَّ الدور أو حتى الشقة كلها.

متخليش حُزنك بجِذر، خليك فرفوش وتقبل أقدارك. هي كده ولا كده حتعدي أوعى تخليها تعدي على عمرك. ببساطة مش هتلاقي وقت كتير عدى وتلاقي أيامك انفرطت والشيب كساك وأنت واقف في نفس المطَل.

سعادتك جواك؛ خرجها.. طولت جوة أوي. اتعوّد تشوف الحلو ويعدي على قلبك مش جنبه.

اخترق الفرح بقوة وخليه يدغدغك، دور عليه بعين عاوزة تعيش وتفرح وتستثمر في عمرها.

أحلي قرش بتصرفه اللي بتفرح بيه وده مش شرط تصرفه على نفسك ساعات فرحتك الحقيقية بتكون في اللي حطيته في إيد اللي جنبك.

عشان تعيش صح لازم ناس كتير أوي تعرف تعيش جنبك؛ خليك فضفاض وخلي اللي معدّى عليك يطّمِن وهو جنبك.

كم الاطمئنان اللي بتدّفي بيه قلوب حبايبك بيرجع لك أمان.

اتحرك من مكانك أنت مش شجرة. متغرزش رجليك في الوحل وتقول ده نصيبي، غيرَّه فورًا. أنت مش عاجز أنت؛ كتير وكبير وتستاهل.

إرادة حلو البقاء اللي جواك تخليك تحط نفسك تحت مفرمة التغيير. حقيقي حتتعب وتشقى وتنجرح، بس أضمن لك سلامة الوصول زي ما أخبرنا القدير.

إحنا ليه بنيجي على الحزن ونطول فيه، تجاوزه. اوعى للوقت اللي بتقضيه سرحان في همك حيهلكك ويطحن قلبك. نط من القطر ده واركب أي مواصلة أخرى، أجرى وانفد بعمرك ومتبصش وراك.

جاور السعيد يعديك. تجاوز آلامك وغلفها بطاقات النور اللي جواك محدش فينا مش مرزوق، بس إحنا مش شايفين أو غضبانين فمش عاوزين نشوف.

صدقني الدنيا مش هتقف أبدًا عليك. خد نصيبك الحلو منها، عظمه وكبّره جواك وعيش بيه وعليه.

لما نشوف كم الابتلاءات عند غيرنا بنحمد، طب كمل وانتصر على نفسك واهزم طاقة النكد اللي جواك.

أنت واخد زي غيرك وهتتحاسب على نفس ميزانه، خلي وقفتك قدام ربنا كريمة. مش شرط عشان تنجح ما تغلطش، لأ ده أنت تأثم ساعات عارف ليه لأنك بتتغافل عن النِعَم؛ عامل نفسك مش شايفها. متخليش حياتك يوم وعدي خليك جدير بالعمر اللي مُنحته.

بأفكرك أنت مش شجرة؛ اتحرك نحو هدفك.. كن قوي، الدنيا تَسحق الضعفاء. خد مكانك على خريطة السعداء وخد براحك هناك وطوّل عندك واستنى. قاوم رغبة الكآبة جواك واتعكز على موارد البهجة، أحيانًا أصعب ابتلائنا هو البداية لأعظم نجاحاتنا.

متغيرش نفسك كتير أد ما تغير المنظور اللي بتشوف منه الدنيا، آن أوانك الآن.. اتغيرَّ.