طالع نازل.. مش كل اللي بيدور على الأمان بيعرف يحافظ عليه، ومش كل اللي اتوجع من حقه ينتقم.

بغض النظر عن إن مي اتجوزت مرتين، وبغض النظر عن اتفاقنا أو اختلافنا مع اختياراتها، أنا شايفة إن الموضوع بالنسبالي أعمق من مجرد ست اتجوزت وسبت جوزها وراحت لغيره.

أنا شايفة مي ست بتدور على الأمان. يمكن فقدته في تجربتها الأولى، ويمكن بقى عندها احتياج كبير إنها تحس إن فيه حد شايل عنها، ومطمنها نفسيًا وماديًا. ولما شافت في علي مصدر للإحساس ده، تمسكت بيه. لكن لما اكتشفت إنه مش قادر يفضل المصدر اللي هي محتاجاه، بدأت تنفر منه.

المشكلة عند مي مش إنها بتدور على الأمان، لأن مين فينا مش بيدور عليه؟ المشكلة إنها كل ما تفقده مع شخص، تدور عليه عند شخص تاني، من غير ما تحاول تسأل نفسها: هو أنا ليه طول الوقت محتاجة حد يوفر لي الإحساس ده؟ وليه بمجرد ما المصدر ده يختفي، كل حاجة جوايا بتتلخبط؟

بحس إن مي شخص بيدور على حاجة، ولما يوصل لها ويكتشف إنها مش كفاية أو إنها مش مستمرة، يبدأ يدور على طريق تاني يوصل بيه لنفس الإحساس. وكأن تفكيره بيتوقف عند لحظة الاحتياج، ومش بيشوف أبعد منها.

وده اللي خلاني أشوفها شخصية معتمدة على غيرها، مش بالضرورة لأنها ضعيفة في كل حاجة، لكن لأنها مش عارفة تقف على أرض ثابتة من غير ما يكون فيه شخص تقدر تستند عليه.

وعلى الناحية التانية، عندنا علي.

أنا بصراحة مش فاهمة علي رجع لمي بسهولة كده ليه؟ مش بلومه على جوازه التاني، لكن بتساءل: ليه مي تحديدًا؟ وليه ما وقفش لحظة يفكر؟

نورا كانت تقريبًا محققاله حاجات كتير. ست حلوة وشاطرة، وعندها قدرة على إنها تشوف إمكانيات الشخص اللي معاها وتطلع أحسن ما فيه. هي عرفت تصنع منه براند، زي مدير شركة شاطر عرف يوظف إمكانيات منتجه ويقدمه للسوق بالشكل الصح.

والأهم من ده كله، أنا عندي إحساس إنها كانت بتحبه فعلًا. ويمكن اختيارها ليه على حساب أمومتها كان من أكبر الدلائل على حجم تعلقها بيه، حتى لو أنا مش بالضرورة متفقة مع الاختيار نفسه.

لكن علي، أول ما مي قالت له نرجع، ما فكرش حتى يسأل نفسه: هي رجعت ليه؟ وإيه اللي اتغير؟ وهل هي عايزاني أنا، ولا عايزة الإحساس اللي كانت بتاخده مني؟

كان المفروض يسأل نفسه أسئلة كتير قبل ما ياخد قرار زي ده، خصوصًا إنه مش راجع لعلاقة انتهت بشكل عادي، لكنه راجع لتجربة سبق وعاشها وعارف أسباب فشلها.

أما نورا، فدي أكتر شخصية عندي تجاهها مشاعر متناقضة.

أنا أقدر وجعها، وأقدر إحساسها إنها اتخذلت بعد كل اللي قدمته، وأقدر جدًا إن الإنسان لما يحط مشاعره ووقته ومجهوده في علاقة، وبعدين يكتشف إن كل ده ممكن يضيع بسهولة، بيكون عنده إحساس قاسي بالظلم.

لكن أنا مش شايفة إن قرارها بالانتقام كان قرارًا كويسًا، بعيدًا عن أي اعتبارات أخلاقية أو دينية.

فيه فرق بين إنك تسيب شخص وجعك، وبين إنك تقرر تهد حياته.

هو مش كوباية عملتيها ولما ما عجبتكيش كسرتيها!

علي إنسان، أخطأ، وخذل، واتخذ قرارات مؤذية، لكن ده مش معناه إن حياته كلها تبقى مباحة للتدمير.

واللي حصل له في النهاية، في إحساسي، كان أكبر بكتير من حجم الخطأ اللي ارتكبه. نورا لسه عايشة، ولسه عندها فرصة تبدأ من جديد، لكن علي حياته اتدمرت، وخسر نفسه ومستقبله، ووصل لنهاية قاسية جدًا.

أنا مش بقول إن نورا ما كانش من حقها تزعل، ولا إنها كانت مطالبة تسامح أو تنسى أو حتى تديه فرصة تانية. بالعكس، كان من حقها تمشي، وتبعد، وتحافظ على كرامتها، وتبدأ حياة جديدة.

لكن مش من حق الألم إنه يتحول لرغبة في محو حياة إنسان تاني.

والغريب إن نورا، وهي بتحاول تنتقم من علي، فضلت مرتبطة بيه بشكل أو بآخر. كأنها ما قدرتش تخرج من العلاقة، حتى بعد ما الحب انتهى، فاستبدلت رغبتها في وجوده برغبتها في تدميره.

وفي النهاية، يمكن أكتر حاجة لفتت نظري في المسلسل إن كل شخصية كانت بتدور على حاجة عند الشخصية التانية:

مي بتدور على الأمان، وعلي بيدور على القبول والنجاح، ونورا بتدور على الحب والتقدير، لكن محدش فيهم عرف يتعامل مع احتياجاته بشكل يحافظ بيه على نفسه وعلى اللي حواليه.

أنا مش محللة نفسية، ومش بحاول أفسر الشخصيات بمصطلحات أو أحط لها تشخيصات. دي مجرد مشاعر وانطباعات تكونت عندي وأنا بتفرج.

لكن يمكن المسلسل خلاني أفكر في حاجة مهمة:

إحنا أحيانًا بندخل علاقات عشان نلاقي فيها حاجة ناقصانا، وده طبيعي. لكن المشكلة لما نختصر الشخص اللي قدامنا في الحاجة اللي بيقدمهالنا. ولما الحاجة دي تتغير، ننسى كل اللي كان بينا، ونبدأ ندور على بديل.

ومشكلة تانية لما نكون اتوجعنا، فنفتكر إن وجعنا بيدينا الحق نوجع غيرنا بنفس القدر أو أكتر.

الأمان مش المفروض يكون شخص بننتقل من واحد للتاني عشان نلاقيه، والحب مش مشروع بنبنيه في شخص وبعدين نهدّه لما يخذلنا، والوجع مهما كان كبير مش مبرر إننا نتحول لنسخة أقسى من الشخص اللي وجعنا.

يمكن دي كانت مشاعري الحقيقية وأنا بتفرج على «طالع نازل».. مش مين فيهم صح ومين غلط، لكن إزاي كل واحد فيهم كان بيدور على نفسه في شخص تاني، وفي الآخر تقريبًا محدش عرف يلاقي نفسه.