من بين كل نِعَم ربنا عليَ اللي أتمنى دوامها كلها نعمة مهمة أتمنى ربنا يديمها؛ نعمة القلب الحي المحب للدنيا الحنون.

على أد الدنيا ما ياما لطشتني وكسرت نفسي بس المعافرة في حياتك تُبقي قلبك حيّ ومحب للحياة.

محدش عارف بكرة بتاعه شكله إيه، اللي متأكدة منه أن رؤيتك من جواك لبكرة بتاعك إنه هيكون حلو وأكبر قوة لك في تحدي الصعاب اللي هتواجهك في حياتك.

دنيتنا ماشية بمراد الله وتفاؤلك بحياتك وقدر ربنا لك بيخلي حياتنا أسهل وأحلى وأكثر صلابة في مواجهة تحديات القدر.

مش هقولك اصنع من الليمون شراب حلو لا خالص، بس خلي يومك يستحق أن تذكره بالخير وتفخر باللي عملته فيه.

كل يوم أضف لقلبك سعادات في حبايبك وصحابك ونفسك والناس اللي متعرفهمش.

محصلة اليوم لازم تكون إيجابية مهما كانت نسبة الفشل والإخفاق فيه، انهي يومك بحاجة حلوة؛ مارس حاجة بتحبها أو كلم حد وفرحه بإنك فاكره، حضر وجبة حلوة واديها لأول حد تقابله تحت بيتك.

لو بتربي طيور زيي، خش سلم عليهم وصفر لهم وحسسهم إنهم مهمين عندك.

طبطب على أولادك من غير سبب واحضنهم وقول لهم إنك بتحبهم أو كلمهم لو بعيد عنك.

كلم أخواتك وأهلك وعبر عن مشاعرك تجاههم.

محاولتك إمْطار حبايبك بالمحبة بترجع لك عاصفة من الأمن تستقر في قلبك.

صاحبك اللي معبرتوش من أيام وبيرد عليك كأنه لسه نازل من عندك قوله إنه أكتر حد مؤثر في حياتك.

متسيبش يوم يعدي عليك من غير ما تملأ كوباية المحبة.

مش هتعرف أنت أد إيه كنت مؤثر في اللي حواليك إلا وأنت واقف أُدام ربنا بتتحاسب ولقيت الحب اللي غرقت بيه ناس منك ومش منك رجح كفة ميزانك ونجاك. إنما تنجو القلوب بالمحبة والود المستمر.

بزيادة على قلبك حمل الهموم، تعافَ وأخرج برة همك. شم ريحة الدنيا الحلوة.

صحيح كلنا لنا ابتلائنا وحاجات كتير نفسنا نعملها وأفراح نتمنى ندوقها وسعادة نفسنا تمر على قلوبنا، لكن كل ده مش بإيدينا.

محدش بيعرف يتصاحب على وجعه، يعني مش هيحبه قد ما يقدر يتعايش معاه ويغلف الخبيث منه عشان مينجرحش منه كتير.

بس اللي في إيدينا حقيقي، هو إزاي تلقط السعادة لما تعدي عليك، لو لقيت شباكك مقفول هتعدي على بيت غيرك.

اجعل قلبك دومًا متاح لنزول القدر الجميل عليه.

يعني إيه؟

هو أنت مش بتلاقي شخص عنده كل ما يتمناه الناس ومش سعيد؟ 

عارف ليه؟ الشباك مقفول متعلمش يدور على صغائر السعادات فمش قادر يشوف إنه مرزوق، هو مش شايف نفسه ومش شايف رزقه اللي عنده، حاطط على قلبه "بلاك أوت" مخلي الدنيا ظلمة.

افتحوا الستاير للنور وخلوا القدر ينور قلوبنا؛ فقد رأيت في رحلتي أكثرنا ابتلاءً كان دومًا أكثرنا رضا وسعادة.

متقلقش من بكرة؛ اقلق لو النهارده نسيت تعيش. لو متأكد إن النهارده مش جايلك تاني، استفد من بهاء وجوده.. يا تفرح فيه يا تاخد منه حسنات تسندك، بس يروح كده زي الدخان والبخار حرام علينا.

رصيدنا اللي بنتسند عليه في شيخوختنا هو عدد ساعات السعادة اللي اتخزنت في قلوبنا وعدد السندات اللي أقمت بيها غيرك، هما دول السبب الأوحد لدفع الضُر عنك.

سيب نفسك تايه وهتلاقي عمرك بيتسرسب من بين إيدك.. ساعتها للأسف هيبقى عندك وقت كافي تندم وتتحسر براحتك.

عِش راضي هتموت مَرْضي.

على الأقل خليك مثل حلو مبهج غيرك يعمل زيك، مش دايمًا العلم اللي ينتفع منه بيبقى علم بحت أو دين؛ سيب في اللي حواليك طاقة لحب الحياة، خليهم يشوفوك مَثَل ينفع يعملوا زيه فيعيشوا حياة أهدى وأقيّم ممتلئة بالسعادة والصبر والرضا.

الكوباية الوحيدة اللي مش عيب تملاها وتسيبها تسرسب على غيرك هي كوباية المحبة.

قوم اتشجع كده واملأ كوبايتك متبقاش تقيل خليك نعنوش وفرفوش وارمِ وجعك كله ورا ضهرك.