ده ابني اللي خطف قلبي بشكله وصوته وعبيره
بحبه مهما يهبلني بألاعيبه وفوازيره
ساعات يغلط وبيحور وأنا راضي بتحويره
ولما بجيبله حاجه حلوة بموت فجمال تعابيره
ولو هيغني ويدندن فنا أول جماهيره
ولو هتقولوا صوته مش حلو أنا بتطربني مزاميره
كفاية عليه قسا الأيام ليه أساعدها فتكديره
ده ابني وسندي فالدنيا وفالأزمات أنا سفيره
ويدعيله ومن قلبي يكون في الناس ليه تأثيره
يكون له فضل ع المخاليق ويدعوله يزيد خيره
يكون متهاب ما بين الناس ليه تقديره وتوقيره
يكون فالكون ليه شأن كبير وصاحب إيد فتعميره
يكون راجل صاحب مبدأ ويسمع صوت ندا ضميره
يارب ساعدني أكون ليه دليل واكون مخلص فتنويره
ولو يبعد عن الصالحين أكون جنبه لتذكيره
ولو يغريه صحاب السوء تساعدني فتغييره
ولو يحتار مابين طريقين تدبرله تدابيره
ولو يغلط وهيقصر تسامحه فكل تقصيره
وتغفرله يارب الناس وتقبل منه تبريره
ويسبقني على الصلوات ويسعدني بتكبيره
ووقت الضيقة والأزمات تلطفله مقاديره
وأكون جنبه لحد مموت صديقه وصاحبه ووزيره
تابع آخر أخبارنا على أخبار غوغول نيوز
التعليقات