كنت قد وجهت نداءً عاجلاً من الزوج المصرى إلى كل زوجة مصرية أصيلة للالتزام بقواعد العشق الكروى عنده، وكتبت بنود الشوط الأول فى مقالتى السابقة واليوم أكمل بنود الشوط الثانى:

■ مشاهدة المباريات حق مكتسب وليست تفضلاً أو تنازلاً من جنابك، ولا يمكن مقايضتها بأشياء أخرى أو أعمال منزلية زى تمام ما بتتفرجى على مسلسلات تركى وأسبانى مدبلجة طول السنة، وبتتحفينا ببرامج الطبخ التى يتم إجبارى على مشاهدتها يومياً بتكاتك وحركاتك يا ست الكل.

■ مش هأقولك يعنى إيه أوفسايد ومش كل وقعة قصاد الجون تبقى ضربة جزاء أبوس إيدك اتفرجى وانتى ساكتة.

■ وللمرة المليون مارادونا اعتزل والجوهرى تعيشى إنتى ونيمار ده لاعب مش قرية ساحلية ومالكيش دعوة كوبر بياخد كام فى السنة عشان من قرك عليه هيقلب أوبر بالساعة.

■ ونحترم نفسنا بأه وبلاش الجمل بتاعة اللعيب ده كيوت أوى وفين جوز شاكيرا وحبيب فيكتوريا، ماتكرهنيش فى أم نفسى وتخلينى أغلط ف الرجالة.

■ نِقصّر الجمل الكلاشيه بتاعة إنتى أهم ولا الماتش اللى شغال عشان ما تسمعيش رد بايخ يقعدك عند أمك شهور الصيف كلها.

■ التحديق فى المزز الجالسات فى المدرجات جزء من المباريات أيضاً ولا يقع علىّ أى لوم بسببه، أنا مش المخرج بتاع الماتش وكونى بأسبح فى جمال الخلق ده فى حد ذاته عبادة.

■ مافيش خروج لحضرتك أثناء الماتشات إلا للضرورة القصوى (لو بتطلعى فى الروح مثلاً) وذلك على النحو الذى ينظمه القانون.

■ لو زنَقّت معاكى وعايزة تشمى هوا يبقى نخرج فى أماكن بتذيع المباريات مع منع الكلام نهائياً أثناء الماتش يعنى اطلبى المشاريب وحاسبى عليها، أنا مِحِرم بس مش كفيل.

■ بالنسبة لرغباتك فى السفر والرحلات وسؤالك قبل الهنا بسنة ما إذا كان العيد الكبير اللى جاى هيوافق يوم الأحد عشان تبقى سفرية طويلة، هو من جهة لو ضغطى عليه أكيد هيوافق يوم أحد.

■ وأثناء السفريات المتنوعة فى الإجازات يراعى أن وقت الظهيرة لو ما تفرجتش على ماتش يبقى احتمال كبير هأنزل ألعب كرة مع الشباب إنشالله فى بير السلم لأنها هوايتى المفضلة سواء فُرجة أو ممارسة.

■ وإذا افترضنا إنى مِكسِّل ألعب خارجى يبقى حتماً هألعب داخلى فيفا 2018 وإذا كِنت متضررة عليكى اللجوء إلى القضاء.

■ قدوم الأصدقاء لمشاهدة المباريات أمر وارد وفى أى لحظة دون إذن أو إنذار مسبق ويراعى تحضير وجبات جاهزة ومقبلات مِشكلة وسخن وساقع وحلو وحادق عشان الضغط العصبى واحتمال تحضرى ملايات وفوط للى جاى على بيات.

■ أى لفظ انفعالى يصدر منى أو من الإخوة أثناء المباراة يتم التجاوز عنه وعدم التعليق عليه واعتباره من سنن الحياة ومن العبث محاولة تغييره أو إصلاحه، سيبى الناس على راحتها تفك عن نفسها مش هتبقى إنتى والزمن والبنزين عليهم.

وختاماً أى محاولة للعبث منك هأنهى ضمانك قبل انتهاء فترة الصلاحية وعلى أتم استعداد أبعت ميل لحماتى أعلن فيه أن المنتج الذى أرسلته لى، وهو سيادتك، غير مطابق لمواصفاتى.