أي تغير نسبي أو كلي في حياتك مش سهل ومرهق، بس لازم تقبله. مرونة عقلك في تَقَبُل التأجيل والتأخير والمنع بتخليك تعيش أحسن وبطريقة أكرم. أنت متقدرش تتحكم في قَدَرك لكن ممكن تتقبله والتعايش معاه هيخليك أسعد وتشوف الدنيا أجدر إنها تتعاش صح.

لما بتتولد وبتكبر مفيش حاجة هتوّقَف عمرك وشيبتك غير حلاوة قلبك؛ بتخليك رغم العجز والتجاعيد محبوب. هنا لازم تقف وتشوف إنك محبوب عشان فيه حاجة أهم من شكلك بتلفت النظر ليك، أنت ببساطة حلو عشان روحك خفيفة وقلبك يسير.

تقبلك لظروفك زي ما هي بتخليك تتعامل أحسن في الدنيا وتشيل من على قلبك ثِقَل الهموم. لو في إيدك التغير للأحسن متترددش لكن اعمل ده من غير لهد، اسعَ برُقي. 

أنت مش شكل وجسم وفلوس ووضع اجتماعي. أنت قلب وروح ومشاعر وطيبة ورِقة وجمال. أنت كل الحاجات الحلوة اللي فرشتها في طريق غيرك. أنت كل المبادئ والقيم اللي اتربيت عليها وكملت بيها وغرزتها في ولادك وكافحت تحافظ عليها.

عارفين ليه فيه ناس سعيدة وناس لأ؟ الإجابة هي السعي. عمرك ما تكون بتشتغل على نفسك ومن يخصك وحتفشل ويوم ما يجانبك التوفيق مش حتندم، بتكون متأكد إن إرادة ربنا غلبتك فترضي وتستكين.

إرادة التغيير والتجويد جواك لازم تعظمها هي دي رجليك في الدنيا. كلنا غرقانين نِعَم بس فيه منا بصير القلب ومنا للأسف ضرير الروح.

الحاجة الوحيدة اللي تهزني في الدنيا لما ييجي عليا يوم وقلبي يقفل وعينيا تزغلل، اتجاهي هيتغير وهنا لازم أقف وأعَدِل الدفة. متخليش الدنيا تربيك.. اتحاسب بدري مع نفسك. ده بيحصل لكل حد فينا كتير وطول الوقت. الفرق الوحيد اللي يخلي ربنا ينصرنا هو القلب.

المُعجِز في هذه العضلة القوية إنها تحت نظر الله جل شأنه. يعني أنت اعمل اللي في نِفسك مش هتاخد إلا بوِسْع قلبك. تلاقي ناس حياتهم غامقة بس بيوتهم منورة، غيرهم النور عندهم مبيقطعش بس كل ما يتحركوا بيكسروا قلوب مش شايفين بعينهم؛ أصل النور مكانه في القلوب.

قابلت في حياتي عثرات ووجع زيي زي ناس كتير حواليا، مخرجنيش من مطبات الدنيا سوى سلامة النية وقلب لم يعرف الكُره لأحد.

 إحنا ليه مُصرين نعيشها صعبة؟ ليه فيه ناس عينيها في رزق غيرها وأنوفها منغرزة بين قلوب الطيبين. لو ربنا كان ارتضى ذلك لخلق البشرية بلا أُسر ولا بيوت وبلا حُرمات. ببساطة اللي ميخصكش عدي من جنبه ومِد في خطوتك.

الناس الواضحة الواعية ذات القلب الممتلئ من أعظم النِعم اللي ممكن تغير شكل حياتك. أصل قعدتك مع الطيبين مكرمة.

متهينش قلبك وصونه عن المتربة. القلب الفقير بيبان في تعاملاتك وحضورك وبيخليك بليد وضعيف ومنكسر.

ارفع راسك في الدنيا بحضور قوي وخلي غيابك مؤثر. أهم نعمة تخرج عليها من الدنيا إنك تلاقي حد يفتقدك. خلي حضورك بين الطيبين مفخرة.

متنساش نفسك وحاسبها بأيدك تصونها وتعِفَها. روحك الطيبة بريحتها الحلوة بتقرب الحبايب وتخلي البعيد يرجعلك.

خليك مغناطيس للخير وليس ملاقيط للشر. الدنيا مش ناقصة عَجَزة. متساهمش في انقراض الطيبين؛ الناس الحنينة كالطيور.. لو ملقيتش عش آمن بتهاجر.

في العائلات العريقة اللي اتربوا على الأصول فيه حاجة عندهم اسمها كبير العيلة.. عارفه؟ اقتبس من هيبته وكمل في الدنيا كبير. ارفع مقامك وكن حيث أقامك تخرج منها علي خير. رحاب صفار