الوقت اللي كنت مبفكرش كتير كنت مرتاحة، الدنيا بتلف والعجلة تدور وكله بيمشي، اكتشفت إنها بتمشي من عمري!

أول ما تبصر؛ تتوقف. الرؤية أحيانًا تكون مهلكة. افتح قلبك بالقدر اللي متنجرحش من اللي بتشوفه، طب وغير كده؟ 

غمض عينك، اقفل عقلك ثم تغاضى وامضِ.

ارخِ إيدك لما تمسك حاجة بتوجعك. مش كل وجع لازم تخترقه. ساعات المواجهة بتمرّر لسانك وتحتاج الحلو تغيّر بيه طعم العلقم فلو مش جنبك حد حلو، بيتغيّر طعم الدنيا في فمك.

متشيلش حاجة وجعاك متخصكش. اعمل زي الأطفال؛ زحلقها من إيدك.

طب أعمل إيه؟ أرخِ قبضة يدك عن كل ما يؤلمك. خلي الحزن ينساب كالرمال من بين يديك؛ يعني مهما قبضت على وجعك في كف إيدك لا تحمل سوى أثر طفيف من الرمال، تنفّض يَدك وتكمِل عادي.

الرمل مش هيسيب أثر على إيدك، خلي الحاجات اللي بتزعل زي بيت الرمل مهما عِليّ موجة ضعيفة تهده وتساويه بالشط.

طب وأنا؟

أنا الموجة وأنا الشط دول اللي مش بيتغيروا وهيفضلوا موجودين. عوامل التعرية صحيح حتأثر فيك بس قبل ما تغيّرك غالبًا حتكون مُت.

متضحكش.. أنت تتغير فقط وقت سماحك للآخرين باختراقك، يتآكل حلوّك ويقتات المترممين على زاد قلبك.

جَبِس قلبك.

أنت عندك زوج من العيون والأذن واليدين والقدمين تقدر تتعايش بواحدة منهم وتستغني عن الأخرى، بس عندك قلب واحد عايش عليه هو الأولى بك أن تحميه، تراعيه وتفاديه.

من صغري وأنا شديدة التأثر بالآخرين؛ بيصعب عليا تعبهم ووجعهم بدرجة بتألم أكتر من صاحب المشكلة نفسه. الوضع ده خلاني طول العمر بتوّجع على ناس أعرفهم وناس معرفهمش.

القلب المتاح ملطشة؛ لإنك بتبقى ممزق في أماكن كتير ومش بتعرف تلاقي نفسك.

مع الوقت بتنسى نفسك وحقوقك ونعمة إنك عايش في الدنيا ومتع مفكرتش تقرب منها عشان إنت بقيت قطع كتير في أماكن أكتر ومش لاقي وقت تعرف نفسك.

أديت غيرك حقوق مش قادر توهبها لنفسك.

طب والحل؟ 

لما تبتدي يومك كل يوم فكر هتعمل إيه النهارده يسعدك؟

لازم يومك يشملك أنت فرد كالآخرين لك حقوق وعليك واجبات ولو مديتش نفسك احتياجك محدش حيمُر عليك يديهولك.

الناس محتاجينك متكامل ومتزن وسعيد، كن رداءً جيدًا لنفسك.

مش بس رداء جيد لكن أنيق منمق وملفت بجماله.

الحاجة الحلوة بتبان من برة. لا تتصنع السعادة، اصنعها.

اجبِر نفسك تعمل كل حاجة بتحبها، في الأول حط أولويات في كل بنود حياتك، في شغلك ترتقي وتزيد وتبذل كل جهدك، مع صحابك تغتني بيهم، قعدة الصحاب جنة لأنك اخترتهم على مقاسك وفضل معاك منهم اللي شبهك فهتعرف تضَحَكهم وتأنس بودهم وتتطمن معاهم. ساعة مع صاحبك كبسولة من هرمون السعادة.

الأهم وأنت وسط أهلك وحبايبك، خليك على يقين أن أيامك معاهم مش أبدية هيجي يوم وتفارقهم، عيش المتاح بينكم كأجمل ما يكون. أنت مرزوق بيهم. استمتع بنِعَمَك!

وكل يوم متنساش تعمل حاجة لغيرك، حتى لو حد متعرفوش أجمل الثواب ما لا تتذكره.

مش كل الأشقياء في الدنيا يدخلون الجنة، بل أصبحت أؤمن أن السعداء يزاحموا في الصفوف الأولى ليدخلوها.

عارف ليه؟ عرفوا نعمة ربنا وقدروها واستمتعوا بها كاملة وقت أن كانت متاحة. الفرق بين الحصول على النعمة والتمتع بها كالفرق بين السماء والأرض.

أنت غني برزقك مش بفلوسك، مليان بنَاسك ومستور بحب حبايبك.

الحب ستر لكل النواقص داخلك.

برجاء ربط الأحزمة!!

استمتع بالرحلة؛ فمتعة الصحبة والإحساس بحلاوة الطريق تفوق رؤية النهاية جمالاً.