هذه المكالمة تلقاها المواطن أبوسمرة السكرة أحد راغبى السفر إلى الساحل الشمالى لقضاء آخر أيامه الصيفية، على رأى الست فيروز، وإليكم التفاصيل قبل الحذف.. «أهلا يافندم، مع حضرتك جهاز تنظيم شؤون الهجرة والإقامة بالساحل الشمالى، وزى ما هو مُدُّون قدامى كنت تقدمت بطلب للإقامة بالساحل 7 ليال، وأكيد حضرتك على علم أنه حالياً فى حملة لتلقى الطلبات والإجابة عن كافة الاستفسارات تمهيداً للحصول على فيزا سنِجل لإقامة آمنة وسعيدة بالساحل، وبالفعل يا فندم الفيزا السنجل هى بنت عم الشِنجل لَزم، يمكن الاختلاف الوحيد إنها بتتجدد كل طلعة ساحل، وشعار حملة فيزا الساحل إنك تكون مواطن مسحول طول الوقت، أما شروط اكتساب الإقامة فهى على النحو التالى..

أولاً: ربيت إيه؟ لا يافندم مش القصد تربية الأولاد أهم حاجة تكون مِرّبى شعر راسك أو صدرك، مربى عضلات الضهر أو السمانة، مربى كلب أو قطة.

ثانياً: بتشيل إيه؟ لا يافندم مش القصد بتشيل المدام فى عينيك، أهم حاجة تكون بتشيل حديد، بتشيل بطاقات ائتمان، بتشيل فى قلبك وحقودى وغلاوى عمال على بطال.

ثالثاً: راسم إيه؟ لا يافندم مش القصد بترسم على جارتك أو زميلتك فى الشغل، أهم حاجة تكون راسم تاتو على دراعك أو كتفك، حاقن بوتكس فى دقنك أو شفايفك، خارم ودنك أو مناخيرك ومرَكّب حلق، الخطوة دى مهمة جداً فى كشف الهيئة ولو سيادتك راسم وحاقن وخارم هيتم تحديد مقابلة وجهاً لوجه فوراً.

رابعاً: لازم تكون رامى حجز فى سبع تمن أماكن سهر لعمرو دياب، طبعاً يا فندم ما هو الصيف يعنى الهضبة والترابيزة الواحدة لا تقل عن عشر أفراد فوق السن القانونى.

خامساً: وفيه أهمية قصوى إننا ناخد بالنا جداً من ستايل اللبس سواء على البيدج أو فى البول الصبح وبالليل، الملابس لازم تبقى ترندى من براندات عالمية وأرجوك يافندم نبعد خالص عن الماركات المضروبة منعاً للإحراج ونلتزم بالبرس كود فى كل مكان.

سادساً: ومهم جداً يافندم نراعى التنسيق فى الشكل الخارجى بمعنى يا إما حضرتك تحلق شعرك وتطول دقنك أو العكس تحلق دقنك وتطول شعرك مع ضرورة وضع سلاسل كتير حوالين الرقبة وحظاظات فى الساعد الأيمن والأيسر وطبعاً القميص مفتوح لحد السورة علشان نعمل كول.

سابعاً: أهمية أن تمتلك بيت من طابقين أو ثلاثة بحمام سباحة أولمبى حواليه جنينة مساحتها 750 متر مربع بجراج خاص لتلت عربيات 4X4 ونش طليانى وياريت البيت يكون موقعه فى القرى اللى تقع ما بين الكيلو 100 و120 وطبعاً قيمتها حوالى 7 ملايين دولار.

دول الشروط السبعة المبدئية للقدرات، لو عدتهم تبقى نصرة قوية بعد كده هيجيلك معاد بالإنترفيو ولازم تعدى اختبار الحياة فى الساحل أو (Life in Sahel test) وهو امتحان شفوى للمعلومات العامة، مثلاً الناس بتنام إمتى، بتاكل إيه، بتروح فين After party، مين فركش، مين أﭭور وآخر إصباحة إسمها إيه، وبعد توافر الشروط المبدئية واجتياز المقابلة الشخصية بيتم إرسال (كيو – آر – كود) QR Code مع ضرورة وضع ديبوزت بمبلغ 3 مليون جنيه مصرى عداً ونقداً فى البنك لزوم التصليح والصيانة، لا يافندم مش القصد صيانة البيت، إنما صيانة حضرتك بحيث تحتفظ بكيانك المسحول أطول فترة ممكنة وده أهم بكتير من التان اللى هتعمله على البحر ومش هاوصيك، أول ما تحصل على الأبروﭬل لازم تعمل لاندينج بعدها بنص ساعة وإلا هتروح عليك الفيزا السنجل وألف مبروك مقدماً.