واحدة من أصدق العبارات التي قرأتها اليوم، ذوو النيات الطيبة دائمًا يفوزون.

يعني الطيب مش أهبل؛ ده متوكل على الحلو اللي في قلبه بيتسند عليه في شدته، هو عارف إن ربنا هيسنده بحلاوة قلبه  فالله لا يضيع الطيبين.

حُسن نواياك بيرجع لك محبة هدوء ونظرة حلوة من اللي حواليك لجميل لمسوه في قلبك.

أنت طيب، آه.. تبقى عبيط وبيضِحِك عليك!!

 لا أنا طيب وده شرفي ومعاك حتى تنفرني فأراك كما لم ترَ أنت نفسك؛ اضطر لعكس اتجاهي فلا تقاطع طريقي بعد اليوم.

محدش بيغير اتجاه سيره إلا لو متأكد إن الطريق اللي ماشي فيه صحراء مش بيوصل فيه للأمان.

أنت وأنت بتروح شغلك أو أي مشوار بتختار طريق قصير واسع مريح وميضيقش خُلقك ولو كان على مناظر حلوة يبقى أحلى وأجمل.

أُمال لما تصاحب صاحبك في الدنيا مبتفكرش كده ليه؟ هي حياتك مش غالية عليك؟ عمرك مضمون أوي؟ ولا أنت مستخسر السعادة في نفسك؟

الطيور على أشكالها تقع، لا تعش في بيت الغراب لو بنيت عُش يسكنه اليمام.

تنوع الحياة من فضل الله علينا، إحنا صحيح كلنا بني آدم لكن مختلفين.

أعتبر الناس كلها زي الألوان؛ مش كلها بتليق مع بعضها، غير أن فيه ألوان بتفرحك وتليق عليك وألوان غيرها بتغير شكلك وتخليك مش مرتاح وأنت شايفها أو بتلبس على لونها.

لن تبدع إذا كان قلبك مجهد؛ التحدي يولد المستحيل لكن الشقاء يوأد مواهبك ويطفيك.

أنا بحب لونين اتنين أكتر حاجة في حياتي الأزرق والأخضر بدرجاتهم، هما دولابي وألوان بيتي بطمن وأنا شايفاهم ولبساهم وعيني بتيجي عليهم.

الغريب إنهم أكثر الألوان حوالينا، سماء، بحار، أنهار، نباتات بكل أشكالها، فطبيعي ترتاح في ألوان شبه كل حاجة حواليك.

زي ما لك ذوق في حياتك خلي عندك ذوق وأنت بتختار شركاء حياتك والوشوش اللي نويت تعيش بيهم.

صحيح الألوان التانية مبهرة وممكن تعجبنا برده، بس صدقني متقدرش تعيش بيهم.

دول وظيفتهم زينة للتجميل عشان تشوف الأزرق والأخضر أوضح وأحلى. يعني بعد شوية عينك توجعك من البريق وتزغلل وساعتها تدوّر على راحتك.

من الأول كده ألوانك المفضلة هما صحبة قلبك الباقي، ديكور تشيله وتنقله في أي مكان أو تغيره لو مبقاش لايق على عمرك.

باختصار متضيعش عمرك بتلبس لبس مش لايق عليك، البس اللي تحبه ويليق بطبعك ويكملك، وهنا تعمل حساب نفسك أنت بس لإن راحتك بتخليك مطمن.

محدش بيعيش في صخب ويقدر ينتج بجودة؛ دائمًا الإتقان وليد الصبر والاطمئنان.

كُل اللي يعجبك والبس اللي يريحك وعيش زي ما تحب مش زي ما يُفرض عليك.

الإنسان مؤسسة آدمية يحتاج غذاء للقلب والعقل والروح، لا تسمح باختراق روحك ثم تبكي من مظالم الآخرين.

اختار تعيش هادي وحلو ومطمئن. لما تجوع اعمل أكلة تحبها ولما تتعب روح للي يقدرك واتسند على حد رصيده عندك كبير.

أنت غالي عند ربنا بيحبك ويقدرك فخليك كمان غالي على نفسك.

الرخيص مرطرط بس الغالي بتتعب عشان تلاقيه، وزي ما بيقولوا دايمًا: الغالي تمنه فيه، ليه بقى؟ أصل بيعيش ويعمّر ويتحمل، خد وقته وهو بيتعمل فطاب مذاقه وحسن بهائه وأصبح له مكانته ومهابته.

أنت كمان نقي؛ اختار واتعلم تفرز الناس وربي عينيك تشوف الصح صح ومتقبلش غلط، صاحبك يكون لونك المفضل واوعى تتزغلل أو تنبهر بحد مش لونك.

كلنا نتحدث والقليل من يتقن الحديث، كلنا نتعايش والقليل منا يعيش.

عمرك تعيشه بنفسك ولا تعشه من خلال الآخرين.