متشوفش نفسك في المراية؛ شوف نفسك في عيون الناس. الناس هي أصدق معيار تحكم بيه على تصرفاتك. محدش بيشوف نفسه وِحِش، غصب عنك الأنا اللي جواك بتغلبك. أُخرج برة نفسك وبص عليك من بعيد.. كام واحد بيحبك بجد؟ كام واحد محتاج لك؟ كام واحد مستعد يشيلك على راسه عمرك كله من غير ما يزهق؟ إجابة السؤال ده لو أنت صادق مع نفسك ممكن تبقى صادمة ومذهلة.

 باستغرب جدًا من شخص بيذوَّق نفسه.. إزاي ممكن أضحك على نفسي؟ إيه الجراءة دي؟ طب بتنام بالليل وتقول لروحك إيه عشان تبنجها؟ لما تكون مريض اتعالج، متاخدش مسكنات لإنها بتضحك عليك؛ شوية ساعات ويرجع لك الوجع أشد وأقسى.

 أنت متشاف كويس أوي وفيه مليون واحد راصد تصرفاتك وبيحكم على حياتك.. ميهزوش شعرة منك لو ماشي عِدِل ومبتضحكش على نفسك. بس أرجوك متخليش مرايتك عامية، لإنها بتزين لك إنك حلو وأنت في الأصل ممكن تبقى قبيح وتافه. أصعب تغيير في حياتك هو تغيير نفسك وتحسين شخصيتك. ممكن تاخد فيه سنين بس والله النتيجة بتبقى مذهلة. عارف ليه؟ لأنك بتحارب أقوى عدو لك.. وهو نفسك.

 المثل المصري بيقول "إيش تعمل الماشطة في الوش العِكِر؟" متخليش روحك من جوة زي المثل ده؛ عِكِرة. ابذل مجهود وخليك حقاني مع روحك، والله أنت تستاهل. لو حتعيش عمر واحد وجب عليك تخليه أنيق. روض قلبك وَضَعْه في مكانه، متخليش الجهلاء يطولوه. 

لما كنت في المدرسة، مكنتش من الأوائل أبدًا، بس عمري ما روحت المدرسة مش مذاكرة أو ناقصني كتاب أو كراسة. عمري ما حطيت نفسي في وضع أُلاَم فيه. مبعملش الغلط لأن نفسي عزيزة عليا. ببساطه باعرف أكون ملتزمه. أنا بحبني كريمة ومُشَرِفة. عشان كده اللي بيدوس على قلبي، اتعلمت أفرمه. كرامتك مخلوقة جواك؛ متوأدهاش.

الفكر ده نجاني طول عمري ومازلت أنتهجه، كان أهم لمساري ولتربيتي لأولادي واتعلمت بيه إزاي أوصل بجودة رفيعة وإن كان الطريق شاق وعسير.

طب إيه اللي يساعدك تمشي صح وتبقى حلو ومُشَرِف؟ حاجة واحدة بس.. متعملش الغلط ولو على رقبتك، ولو حتموت من الوجع والحرمان. ساعتها لو مُت، حتبقى مُت بشَرَفك وعلي حب الناس لك وتلاقي اللي بيدعي لك وناس كتير تبقي قِدِرْت تأثر فيهم بالخير ويمشوا على نهجك. عاوز حاجة تانية من الدنيا غير كده؟ أنا عن نفسي لأ. 

ضمان أمانك الوحيد هي سلامه قلبك. محدش فينا عشرة على عشرة، بس لازم تبقى من ستة لتسعة عشان تنجو. متبقاش بليد واشتغل على نفسك. عمر ما البداية كان لها وقت، وقتها وقت ما شوفت نفسك. الحِدِق اللي فينا يشوف نفسه بدري ويشتغل على نفسه بجد ويحاول ويكافح ويؤمن بحاجة واحدة بس.. إنك لازم حتوصل. محدش بيقرر يعمل حاجة صح ويكافح فيها إلا ولازم ربنا يوصَّله.. لازم حتنجح. 

متنساش إن حياتك اختبار، مهما طال أو قصر حتقف أُدام ربنا. اشتغل على نفسك عشان اليوم ده؛ عشان لما تقف أمام الله تبقى مرفوع الرأس راضي عن عملك، ولما تطلب رحمته تكون قد استحققتها. لو نظرك ضعيف، البس نظارة وبص بجد جواك أنت تبقى مين. اشتغل إنك تبقى جدير بالعمر اللي ربنا وهبه لك. فيه ناس بتموت صغيرة جدًا وأنت عايش سنين لاهي ونايم عن نفسك.

 ابتدي دلوقت حالاً في التو، لو ضامن عمرك خد وقتك بس لو ميعادك مش عارفه موت وأنت بتحاول تبقى أحسن. متخليش حقدك يغلبك.. قلبك يستحق تشوفه في الجنة وتنَعَمه في الدنيا. جنتك وسعادتك وهَنَاك وسَعدك في روح لا تعرف حقد ولا حسد ولا تؤذي. أكرم أصلك وأهلك وحبايبك وخليك دايمًا من ستة لتسعة.