■ إحنا اللى على خط الاستواء، مش مرتاحين اجتماعيًا لكن فى نفس الوقت مش معدومين ماديًا، صحيح بنشتكى مُر الشكوى، لكن ف الآخر بنتصرف وربنا بيدبرها.

■ إحنا اللى شكلنا حلو وشيك ومهندم شبه الناس اللى فوق بتوع الطيارات الخاصة، بس عيشتنا فيها شبه من الناس اللى تحت بتوع الأجرة وكله على الله.

■ إحنا اللى بندفع الضرايب على داير مليم عشان البلد حالها يمشى، وإحنا برضه اللى بنلم تبرعات عشان الغلابة تعرف تعيش وتتعالج وتتعلم وتاكل وتشرب وتلبس.

■ إحنا اللى أبدعنا نظرية البدائل لما المنتج ارتفع سعره وشجعنا المحلى وإدينا ضهرنا للمستورد ولما المحلى عَلَّى على المستورد، إحنا برضه اللى بقينا نفاضل بين منتج ومنتج ونختار المتهاود ونستنى العروض والتخفيضات والخصومات.

■ إحنا اللى بنشتغل بدل الشغلانة اتنين وتلاتة عشان نحضر آخر الشهر الغلة ورغم كل الأنظمة اللى بنتبعها كل شهر، برضه الميزانية مخرومة.

■ إحنا اللى بيتشال من علينا الدعم عشان المسؤولين يشوفوا شغلهم ويديروا الأزمات بما يتناسب مع الصالح العام عشان اللى تحت يرتاحوا ويخف من على كاهلهم الحِمل.

■ إحنا اللى شايلين على أكتافنا هموم اللى حوالينا وملتزمين بالتزاماتنا وبنحل ونربط وندعم غيرنا على أد طاقتنا وإحنا برضو اللى بندور على نفر يشيل عنا مسؤولياتنا ويحلها ويدعمنا.

■ إحنا اللى نحدد النسل رغم إن اللى تحت بيجيبوا عيال بالهبل وإحنا برضو اللى بندفع التمن.

■ إحنا اللى بنرشد الاستهلاك عشان نخفف الأحمال وإحنا برضو اللى بنصبر على انقطاع التيار الكهربائى ونقول ما هو نور ربنا كفاية.

■ إحنا الطبقة المهروسة ما بين مصاريف مدارس وجامعات ودروس وبيت وجهاز الولاد والأقساط اللى ما بتخلصش.

■ إحنا اللى بنرد على المأجورين والخونة ونوقفهم عند حدهم وبنعرّفهم مقامهم ده إذا كان ليهم مقام أصلًا، وإحنا برضو اللى بنحاول ننشر الوعى ونصحح المعلومات ونواجه الشائعات بالانتماء حبًّا فى الوطن.

■ إحنا زى ما بيقولوا علينا رمانة الميزان اللى من غيرها لا اللى فوق هيلاقوا حد يخلص لهم شغلهم ولا اللى تحت هيلاقوا حد يدفع لهم عشان يستمروا.

■ إحنا الطبقة المفرومة وشايلين الشيلة مع اللى فوق ومع اللى تحت وصابرين وراضيين ومؤمنين إن فرجه قريب وأقرب مما نتخيل، وبنقول يا رب دبر فإن الخير معك.

■ وإحنا برضو اللى عاملين زى الطور فى الساقية، اللى لا عارف يقف ولا قادر يكمل ومعندوش رفاهية الاختيار وطول الوقت طاير من عينه النوم ورغم كده مش مصحصح لروحه.

ومع ذلك ورغم كل اللى فات ومع كل اللى جاى نحن هنا! إنتوا بقى مين؟!.