■ إحنا الشعب الوحيد اللى فاكر إن الحق والباطل قرايب.. يقولك عايز الحق ولا ابن عمه!
■ إحنا كمان الشعب الوحيد اللى مقتنع إن لفظ «وحياة أمك» شتيمة ولفظ «وحياة أبوك» يعتبر طلب عادى!
■ إذا قيل لك حتماً سيظهر وسط العتمة نور! أمانة عليك إبقى روح إطفيه وخش نام!
■ أقسم بالله الواحد قَرّب يفلس من كتر ما بيشترى دماغه!.
■ مطلوب غواص ابن حلال ينزل يجيب ليا كل الخير اللى عملته ورميته ف البحر!
■ مش عارفة ليه بأحس إن الفص اللى مسؤول عن القرارات فى دماغى.. ده فص توم!
■ فى تصورى إن نظرة المجتمع للدكاترة اليومين دول غريبة جداً يقولك الأطباء يسعون من أجل المال، ده على أساس إن بقية المهن بتسعى بين الصفا والمروة مثلاً!.
■ يعنى إيه إعلان منشور عن بيع مقابر على بعد عشر دقايق من كارفور، هو الميت هيعمل إيه بكارفور بعد ما راح يتحاسب!.
■ سؤال تأملى.. يا ترى فى أى عمر يتوقف الرجل عن البصبصة للنساء؟.. إجابة حتمية: أعتقد فى عمر مكرم!.
■ هل صحيح أن آخر مرحلة فى عمر الرجل بعد محطة الراجل البركة هو إنه يكون الراجل النجفة، ما هو مش طبيعى يتقال له طول الوقت منور يا حاج!.
■ سؤال من أولياء الأمور لمعالى وزير التربية والتعليم: «سيادتك عايزنا نشترى ملازم مراجعة ولاّ نضاعف سرعة النت ؟!.
■ واحد بلديتنا استلم شهادة ابنه الحِيلة وقاله «يعنى إيه النتيجة ضاض جيم يا جحش؟» فرد عليه «يعنى ضناك جامد يابوى»..!
■ واحد حرامى مش بلديتنا سأل ابنه عن أخبار الامتحان الشفوى فقاله «ماتخافش يا كبير، البهوات قعدوا ساعتين يسألونى وأنا ما نطقتش كلمة..!».
■ أما بلهاء أعجوبة كلية الطب، حين سُئلت عن مدى استعدادها لامتحان النسا غداً قالت بكبرياء «كل اللى أنا فاكراه إن العيل بينزل برزقه...!».
■ يقولون إن الطفل فى بطن أمه يرى شريط حياته المستقبلى بالكامل.. والسؤال هنا: معقول شاف ورضى ينزل..!؟
■ هو الإنسان لو قرر يفشل وفَشَل بالفعّل يبقى كده نجح...؟!
■ هناك خبر عاجل فى انتظار نفيه أو تأكيده، وهو إعفاء جميع أصحاب المهن اليومية من عمل مسحة، لأن الدنيا مسحت بيهم الأرض أساساً...!.
■ هل تعلمون يا سادة أن إله الشر عند الفراعنة إسمه «ست».
■ والست ما بتحبش الراجل الرغاى ولا الراجل الساكت.. إبقى إرغى معاها وانت ساكت الله يباركلك!.
■ ست عانس بتقول لصاحبتها «لو حبيت أجيب هدية لراجل.. يا ترى أجيب الراجل منين؟».
■ ست عجوزة بتقول لجوزها «لما أموت وأروح الجنة نفسى أسأل خوفو الهرم الكبير إتبنى إزاى؟» فرد عليها «غالباً خوفو فى جهنم يا حاجة»، فقالت له «خلاص إبقى اسأله إنت على انفراد».
■ واحد نحنوح قال لمراته «هأصوم عن كل النساء إلا أنتى» وبعد فترة سألته «أخبار صيامك إيه يا صديقي» فقال لها «مع الأسف جالى هبوط واضطريت أفطر»..!.
■ قالت لى صديقتى المطلقة «مشكلتنا كستات إننا لما بنقعد كتير من غير راجل، سقف طموحاتنا بيعلى».. ملحوظة: صديقتى حالياً بتدور على واحد ملون وبيطير...!.
■ علمت مؤخراً أن زيزى جارتى فى غرفة العناية بالبشرة وتحتاج لمتبرع فوراً لديه ملقاط، فقلت فى عقل بالى «يا رب جيب الحواجب سليمة»..!.
■ سمعت واحد مسطول بيقول لصاحبه «يا عم وفر البنزين وهات بفلوسه حشيش هيوديك أى حتة وإنت قاعد مكانك..!».
■ حكمة اليوم.. إوعى تعيش حساس زى الطبق الصينى أقل خبطة تكسره، خليك زى المواطن المصرى فَشَر الحلة البريستو، نار تحته وضغط فوقه وقاعد يصفر...!.
■ أعتقد أن الأيام اللى فاتت أعطتنا دروس كتيرة وأتمنى إن كل اللى جاى يكون حصص رسم وكفى...!.
■ سؤال فلسفى أخير.. هو أنا لو اشتريت خاطر الناس وطلع بايظ ينفع أرجعه..!؟.
■ بيقول الجرعة التالتة من اللقاح لتعزيز المناعة، والرابعة لتقوية الشعر والخامسة لنقاء البشرة والسادسة لجلب الحبيب ورد المطلقة.
تابع آخر أخبارنا على أخبار غوغول نيوز
التعليقات