لما تشوف أشجار الصفصاف على سطح الماء، تبهرك الصورة الحقيقية الحلوة للشجرة على سطح الماء.. ساعات انعكاس الصورة بيكون أحلى من أصلها.

كل مرآه تظهر حقيقة الشكل الخارجي وكل منا يرى نفسه فيها، ولكن ليس كما يرانا الآخرون.

 أنت لست من تظنه، أنت من تنكره في نفسك إذا اختليت بها.

المقولة دي أكتر حاجة صح أثبتتها لي الدنيا. تلاقي إنسان محدش يختلف على أنه غير سوي وهو شايف نفسه طاووس زمانه.

البني آدم مرايته عامية وساعات عارية، يعني مش شايف نفسه فيها أصلاً. لما تحب تشوف نفسك صح، متبصش على خيرك عشان هيغُرك، بص على شرك!!

هو أنا ليا شر؟؟

طبعًا.. خليك خريف لقلبك، يعني تبص على كل وجع سببته لحد تتخيله ورقة صفرا.. لا تتركها تسقط بمفردها، إنما أنت انزعها بقوة لتجدد أوراق خضراء تَتَسبب في تطييب خاطر الآخرين.

ممكن تغلط بس واجب عليك تصحيح خطئك، متخليش نفسك الشخص اللي يقتات على قلوب الطيبين. الناس ممكن تشيلك يوم وشهر وسنين، بس وقت ما يتعبوا بيغيرّوا الدفة عكس اتجاهك.

قدرتي على تحملك مرهونة بعدد الأيام اللي خلتني فيها مطمنة، فلو كنت مصدر الألم والوجع في حياتي، مستغرب ليه إنك خرجت بره دايرتي للأبد.

العلاقات الإنسانية تحتاج مجهود حقيقي لتثمر علاقة تعيش معك للأبد.

استثمر في محبة وسند ووقت بتقطعه من عمرك وتديه لغيرك وطلبات تحققها له، بس قبل ما تعمل ده تأكد إن الشط آمن.

عمرك هو عدد الأيام الحلوة اللي بتقضيها في الدنيا، عيشها جنب حد أنت متأكد إنه مش هيدوس عليك، ودايمًا هتلاقيه لما يتوه منك الطريق.

محدش يقول لي "وأنا هعرف منين؟"

لا أنت كنت عارف كويس جدًا وحاسس وشبه متأكد وتجاهلت معرفتك وأنكرتها وغمضت عينيك عن أسباب واضحة كانت بتقولك طول الوقت امشِ وفضلت للآخر لحد ما انجرحت.

أحيانا نكون نحن سبب أوجاعنا، لما نتجاهل صوت من جوانا بيرشدنا للصح ونغطي عليه بحجة الصبر والمثابرة.

لا والله الصبر لمن استحقه والمثابرة لمن شد من أزري طوال الطريق، غير كده أتحمل وِزري لوحدي ومشتكيش؛ أنا من ظلمني.

كلنا معندناش الرؤية الكاملة لكل ما نمر به، بس حقيقي دايمًا فيه إشارات ربنا بيبعتها لنا طول الوقت. تجاهلك لوجوب التغيير وتأخيرك في استعدال دفة حياتك بياكل عمرك ويستهلك سعادتك.

الأشرار يقتاتون على مخرجات قلبك الحلو.

ليه لما تجرحنا سكين بنجري نوقف الدم في ساعتها، وليه لما حد يجرح قلوبنا بنسمح له بالمزيد. جبر القلوب أولى وستر النفوس مقدم وأفضل الخير على الإطلاق دفع الضُر عن نفسك.

اقضي عمرك مع ناس تستاهلك، ناس شايفينك كبير، ناس مقدرة وجودك جنبهم، ناس بتحسسك "أنه لما أنت جيت، أنا اطمنت".

أكتر حاجة ندمت عليها في حياتي ليس معروف صنعته في غير أهله، فأنا أهله وأنا استحققت الخير من فعلي، لكن ندمي أنه كان هناك من أحبابي من هم أولى بمحبتي وتجاهلت إشارات الله لي.

لو فعلت المعروف في أهله لاطمأن قلبك ليوم الدين. ساعتها مش هتحس إنك رميت عمرك في بير مفيهوش مياه وانكسر عملك وسمعت طقطقة قلبك وانكسار نفسك.

طب أعمل إيه؟

أقولك، لما تروح تشتري فاكهة، بتنقي اللون والقوام والريحة الحلوة ودرجة السِوا اللي بتحبها، ولو ثمرة معطوبة بترميها. مش كده؟

متشتريش فاكهة من تحت عربية الفاكهة، انتقِ من فوق وِشها الأحلى وانتقِ حتى آخر ثمرة قررت تدفع تمنها، مهما كان الغالي تمنه فيه.

ده بالضبط المطلوب منك.. باللغة العربية هقولك "جاور الطيبين".

متشتريش اللي يتقدم لك!! أرجوك انتقِ!

متتنازلش عن الجودة في حياتك، واوعى يعدي عليك يوم وتسيب قلبك مكسور، مش مهم أخدت وقت أد إيه عشان تستوعب الحكمة من حياتك، المهم إنك بقيت بتقرأ إشارات الدنيا وبتعرف امتى تقف وامتى تمشي وامتى تغير اتجاهك.

العبرة في الحياة بالخواتيم؛ أيام قليلة بجوار الناس الحنينة وحياة حلوة تبنيها وأنت شايف مش مِغَمي، لها طعم العسل الدافئ على اللبن.

المر في لسانك يعدله الحلو اللي بتحاول تضيفه لأيامك وتحسن بيه جودة أحلامك.

كفاية كوابيس وأنت صاحي، انتقى عشان تقدر تنام مطمئن.