حاجات كتير أوي اكتشفت إنها نقصاني.

فلوس.. خالص، مركز وعلم.. هفضل طول عمري أتعلم، حب.. راضية ومطَمِنة.

ناقصني أعرف نفسي وأتقن المعرفة دي كويس وأهضمها.

إحنا بنعيش بعيد أوي عن نفسنا، محدش بينجح ويعدي من الدنيا بخير من غير ما يفهم نفسه ويعرف هي محتاجة لإيه، أنت بتتعب وتتعذب لو مفهمتش. 

يوم ما تلاقي حد جنبك يساعدك وينور عقلك بتعشقه حد الجنون؛ بيخليك تنور من جواك متنطفيش، بس محدش دايم لك.

طب واللي مالوش صاحب يعينه؟ خلاص كده يضلِم؟ 

غلطان بشدة، ده أقوى واحد فينا هو ده اللي بيسندك أنت لما متفهمش نفسك.

طب لو كنت لا تجيد التعبير عن نفسك ولو كان اللي جواك لسه مطلعش ولو كنت ذو قلب كتوم ولو كنت تمارس اللي أنت محتاج له كرد فعل وكنت من فئة من البشر يقال لهم المنغلقين على أنفسهم؛ اعرف إنك هتتوجع كتير مهما كنت مسالم وحنين. هيجيلك وقت تتفرج على نفسك من بعيد ومش هتعرفها.

وأنت بعيد عن نفسك مش هتعرف تريحها ولن تجيد التعبير عما يحتاجه قلبك.

هنا أنت في ورطة.   الحق بجد، أنت ساهمت مع آخرين في انغلاقك، إمساكك عن التعبير عما تحتاج في أكتر وقت أنت محتاج هو خطأك الأكبر! علامة ممنوع الدخول اللي حاطتها على قلبك بتخليك تلف في دايرة مغلقة طول عمرك. دايمًا هتلاقي سعادتك مش مكتملة؛ دايمًا محتاج كلمة أحلى وتقدير أكبر وحنيّة زيادة.

انضج!

هو كان لازم تجرب بنفسك وتتأكد إنك كده بتفشل؟ ليه مسمعتش الاستغاثة جواك بتقولك "أنت الآن تسير عكس الاتجاه!!" يعني هتتفرم.

محدش هيديك وسام استحقاق عشان ملكش طلبات، مش بتتشاف أحسن، مهما كنت مهم في مكانك.

أنت اللي بتصنع قدَرَك، أنت بس اللي ممكن تحفر مكانتك وأنت بس اللي ممكن تقدر تكون الأفضل لنفسك.

عيش بدماغك القديمة ومفيش حاجة في حياتك هتتغير.

آن الأوان أن تعيش على مراد قلبك.

اطلب المحبة زي ما تتمناها وتحلم بيها ومتتنازلش عن كل اللي يطمن قلبك.

ما دمت تؤدي جيدًا يحق لك أن تطمئن.

ما أعقد النفس البشرية وما أحوجنا لله.

بس أنت لسه واقف لوحدك، قف مرة مع نفسك، بإيدك تحاورها وتطيّب خاطرها وتهَوّن عليها صعوبات دواخلها.

محدش ممكن يحس بروحك من جواها إلا أنت. صعبة صحيح لكن مش مستحيلة.

أنت المقام العالي اللي بتبني فيه طول عمرك، خليه مقام رفيع بتقديرك المستمر لذاتك.

اعمل حاجات كتير لنفسك فرحها وحسِسها إنك مهتم بيها. لو الدنيا كلها كانت تحت قدميك مش هتشوفها حلوة غير لو روحك اغتنِت بيك أولاً.

اكْبَر لنفسك.

تقديرك لاحتياجاتك لازم يكفيك ويرضيك. أنت مش مخلوق للعطاء وبس، لأنك لو جُعت وملقيتش وجبة تسند قلبك هيطلع لك أشواك تأذيك وتضر حبايبك؛ هتبقى زي الصبّار متقزم عشان المياه اللي بيتحصل عليها دايمًا قليلة.

اتزاني في الدنيا مرهون بكفاءة وجودة إدارة روحي. اختار دايمًا مصادر مياه نقية تروي ساعة العطش.

 متكسلش تعيش حلو.   البركة دايمًا في استثمار عمرك مرهونة بالمقدار اللي تشوف نفسك فيه مستحق للحياة.   حط روحك أول أولوياتك وكن بذاتك أول المستفيدين من قلب لا تنقطع عنه الحياة.

حياتك هي لحظات الري وقت الحر؛ ندّي قلبك ولبي احتياجاتك.

خليك واحد من الناس اللي بتحبهم وتخدمهم بقلب وكن كتفًا قوي لذاتك.

كن لذاتك أول وأهم أولوياتك ليستمر عطاؤك ويُنتفع دومًا من حياتك.