حِس بحياتك وحِبها؛ تقبلها زي ما هي وارضَ بيها وعنها، محدش معندوش حلويات كتير في حياته، الكل منا مرزوق.. إحنا اللي بنقول لأ ده مش كفاية.

صباحك العادي وأنت بتستقبل يوم جديد بصحتك وكُباية الشاي بلبن في إيدك بالدنيا، وأنت بتشربها.. احتَسِ.. حس بحلاوتها وطعمها وإزاي بتحلي بداية يومك.

 نزلتك شغلك بالسلامة وإنجازك يوم عملك بالدنيا، بتحسسك إنك عايش وعندك هدف وبتحقق نتائج.

صباح الخير اللي أنت مبتسم فيها من قلبك وأنت داخل شغلك بتأكد لك أد إيه أنت قلبك حلو وعايش.

دعوتك من قلبك لحد متعرفوش ماشي في الشارع بتطمنك إن قلبك عَفّي.

بحثك المستمر طول عمرك عن ناس الدنيا ضيقة عليهم أكتر حاجة تخليك مطمن إن ربنا هيفضل في ظهرك.

خروجة حلوة مش مترتبة مع صحابك اللي فيه منهم مشوفتهمش من سنين ضوئية وقعدتكم كأنكم كنتم لسه شايفين بعض امبارح من غير عَتَب ولا لوم.. ساعات من مجرد السرد للي وقع مننا من أحداث.. حاجة حلوة تخليك مبتسم كتير أوي.

 بيتك المكَركِب يعني دلالة حياة وحوضك المليان مواعين معناها إنك عايش وإن حواليك ناس بتحبهم وبيشاركوك العيشة الحلوة.

تحضير أكلة حلوة لأولادك وأهلك وحبايبك بالدنيا عشان ده معناه إنك بصحتك وبتحبهم وبتحط حبك في الأكلة اللي بتعملها لهم.

حياتك المنكوشة دي والله أكبر نعمة.

أوعى تفتكر إن تحديات يومك دي عبء لا والله دي أكبر نعمة. انشغالك بحبايبك مش عبء؛ ده فرحة ووقت بيعدي في سبيل الحب.

كَركِبوا بيوتكم بحياة حبايبكم.. دَخَّلوا الحب البيت وأنتم بتفتحوا تهووا وتشمسوا الصبح، الحب كائن أنت بتخلقه وتزرعه في البيوت والقلوب فتصنع به الذكريات. ده اللي يخليك عايش. حياتنا شوية أيام ومواقف وأكلات وضحكات، وقفات وسندات، وجع وحب وأمل وإخفاقات، زي ما هي حِبها وصلح وابني فيها، بس متنساش تعيشها. متعديش على عمرك؛ عِيشه.

سندة الطيبين لك وأنت في شدتك متتنسيش.. بتطَمنك مش كده؟ كام واحد حَبَك من قلبه وسندك بود ومكنش بيقضي جنبك وقت ومطلعش في الآخر عاوز يستفيد منك.. كتير مش كده؟

خناقات ولادك الصغيرين نعمة، استمتع وأنت بتربيهم. أيام وحيكبروا.. خلي عندك حاجة حلوة يرجعوا لك علشانها. خلي رجعتهم لك عبادة مش عادة. لو عايز تفضل موصول بيهم حبهم بأقصى طاقتك وربيهم صح أكتر من استطاعتك.

بافتكر وأنا صغيرة أد إيه كنت في صدمة من كمية المجهود اللي المفروض أبذله مع ولادي عشان أحس إني بأعمل اللي عليا وضميري مرتاح.. حقيقي وهم. أكبر النعم هي أولادك وهما أحلى طعم في فمك.. عشان يبقوا صالحين وأحسن منك بكتير، شوفهم معجزة هيبقوا كده وأكتر.. وعلى غير كده متسعاش. خليهم دايمًا جوه عينك وحاوطهم باهتمامك وحبك.. دول امتدادنا وسبب فرحتنا، ربنا فطر قلوبنا على حبهم فلو قصرنا معاهم شكلنا حيبقى بشع وإحنا بنتحاسب.

 حاجة حلوة أوي إنك تشوف إن حياتك تستحق أن تعيشها والأحلى والأقيّم إنك تستمتع بجد بيها.

 كل باب في دنيتك وراه حياة، ناس مستنياك وناس بتحبك وناس أنت أملها وغيرهم أنت سبب فرحتهم، وناس تانية هما أملك وسبب بقائك وكل فرحتك والسبب الوحيد اللي مخليك معافر في الدنيا، وساعات ناس تانية مش طيقاك.. وماله دول يشيلوا دول.

 أنت كتير أوي، بمخاوفك ونجاحك ووجعك وفرحاتك أنت صانع معجزاتك. أنت الحلو بقوتك وضعفك. أنت كل دول وأكتر، أنت رصيد الحب اللي قدرت تطبطب بيه على قلوب حبايبك.

عرفت أنا نفسي تشوف حياتك من أنهي منظور وتستمتع بكل يوم منها إزاي؟ ماتفوّتش حاجة منها.. مفيش وقت.

يوم ما نتجمع عند ربنا أنت في العلا وهتبقى مطمن لو بس فهمت السبب اللي ربنا منحك علشانه حياتك. خليك مكَركِب ومنكوش وانبسط.. مش كل الكراكيب وحشة ومش كل منكوش مش مدروس.