مين فيما ماتغيرش
ومين فينا ما سابش الماضي فيه علامات
مين فضل ثابت ماتطورش
ناس عاشت سنين سنين ساذجة
بقت حيتان مابترحمش
ناس كانت الطيبة سكناها
خرجت بوشوش ماليها الشر
وناس كانت مخالبها سبقاها
دلوقتى بتخاف لو حد من جنبها مر
وناس كانت في الغي غرقانة
صبحت بالخير والنور مقابلنا
مين فينا ماتغيرش
مين فينا ماتعلمش
وعلم على الأيام بسكوت وكلام
حكاوي منها الشهد دوقناها
ومنها المر
مين معداش الطريق شايل وجع وحمول
مين وقع وقام واتشد
ومين وقع وانكسر واتهد
فيه اللي قرأ الكتب أتعلم
وفية اللي اتعصر وعرف خلاصة الورد
الحكمة تاج فوق تجاعيد الجبين زينة
بس لما تشيب وتعيب وتتهور
عمر العذر ما يتقبل ويتقدر
مين فينا ماتغيرش
مين م البكا متأثرش
مين فينا بعد الهجر قلبه سليم
وبعد الفقد عاش وما تكسرش
مين حقق الحلم بعد جهد وضنى
ومين منه الحلم هرب واختفى
فيه ناس راح تسيب وراها تاريخ
وناس حفرت في الصخور سكة
ناس أسمها راح يبقى طاقة نور
وناس تتنسي لما تفوت
لكن كلنا بنكبر
والخبرة معانا في زيارة
بنتعب وبنعافر
نقاوح ونقول جامدين
ما العجز مسيره يطولنا لو عايشين
شبابنا مش دايم
والقوة في الساعد تخذلنا يوم ورا يوم
نظرنا يمكن في الرؤية بيخادع
لكن يشوف ابعد مما تشوف العين
ومن غير ماغيرنا يتكلم
بنسمع ونحس ونسلم
يمكن عشان الطيبة والفطرة
ماسكين فيها بقلوبنا
ومش سامحين ليها بالتغيير
مين فينا ماتغيرش
مين فضل كما التمثال
والروح منه مفارقة كالعادة
جسم بلا احساس
صورة بلا معنى
مجرد أسم في شهادة
بتثبت إنه نفس الشخص
والأسم ماتغيرش
صحيح فيه حاجات مابتتغيرش
زي إننا بنتولد ونموت
لكن بيتولد كل يوم تغيير
تابع آخر أخبارنا على أخبار غوغول نيوز
التعليقات