مقالات
عدد المشاهدات 311 قراءة
هي السعادة إيه؟؟؟
غير شوية حاجات صغيرة
بسمة في عيون بريئة
أو ضحكة من القلب معطرة
صاحب أروحله وقت همي
أشكي....... يطبطب
أرجع وكإن الهم راح
والدنيا قدّامي منورة
هي السعادة إيه؟؟
غير حضن الحبايب
لمة العيلة والولاد
ورجوع اللي غايب
أكله كان نفسي فيها
يعزمني عليها القرايب
والأهمّ ألاقي جنبي
حد يسندني.....
وقت المصايب
غير كلمة حلوة حنينة
بيت صغير.....
من البرد يضمنا
أو حتي كبّاية عصير
باردة وقت الحر.....
تنعش قلبنا
ويوم ما الدنيا تضيق عليا
ألاقي مبلغ كنت ناسي
إنه حتى عندنا
غير أني ألاقي أسمي
في قوايم النجاح
أجازة هادية وراحة
بعد شهر من الكفاح
أو لما أغلط وأعتذر
والدنيا تقوم وتتهبد
تصفى النفوس
ونقول سماح
هي صحيح....
شوية حاجات صغيرة
بس مين قال السعادة
إني طول اليوم
أرقص وأغني
واتشيك في الأفراح وأهنّي
أو رصيد في البنك عندي
ده اللبس والفلوس يا أفندي
مش بيملوا القلوب اللي فاضية
أو يصلحوا النفوس اللي عايبة
وكفاية بس إني أرضى
وإن ربي يرضي عني
متابعين
تابع آخر أخبارنا على أخبار غوغول نيوز
التعليقات