من أجمل النعم اللي ربنا أعطاها لي هي قدرتي على التعبير عن نفسي من خلال الكتابة، حقيقي نعمة غيّرت كتير في حياتي للأحسن.

كلنا جوانا مشاعر وأحاسيس وغضب وفرح وحاجات نفسنا نوصّلها لغيرنا، وثوابت وقيّم نفسنا نسيبها لأولادنا، الأهم هي قدرتك على التأثير في غيرك.

يمكن نصيحتك لحد بتحبه ميخدش بيها قد ما تخليه هو يقرأ ويتفاعل ويصل بنفسه إلى نفس الطريق اللي كنت أنت تستهدفه.

 الكتابة بتساعدني أكون أحسن؛ مجرد إخراج مشاعري فيه نصف الشفاء لكل أوجاعي، لو كنت إنسان كتوم أو حساس، قدرتك على التعبير عن نفسك بالكلام بتكون محدودة للغاية، هنا يجي دور قلمك؛ أصبح هو معالجي النفسي.

 ببساطة مش كل موقف صعب عدى عليك في حياتك ينفع تتكلم فيه. أحيانًا تأثري بموقف شوفته بيخلق جوايا بركان من السعادة أو الغضب؛ تنسيق مشاعري من خلال الكتابة تحافظ على قلبي من الذوبان.

مواقف كتيرة بنمر بيها لو مخرجتش من قلوبنا بطريقة سليمة ممكن تصيب أرواحنا بالعطب.

كلنا عندنا حتة حلوة جوانا نقدر نستثمرها لصالحنا. فيه منا ناس تجيد هوايات زي الرسم، الرياضة، تصليح الأشياء، الكتابة، الدراسة، العمل، السفر، القراءة، العمل الخيري.. المهم تؤمن بنفسك وقدراتك وتعمل حاجة تَعود عليك أنت شخصيًّا بنفع.

 ولو معملتش حاجة تفيدك هتعمل حاجة تضرك، أو متعملش خالص وده قاتل؛ ساعتها جسمك هيفضى من السعادة. اكتشف نفسك؛ كل سن ووقت له جماله وله أوانه الحلو، متأجلش حاجة حلوة ممكن تقدمها لنفسك.

معظم الناس اللي قدروا يوصلوا للسعادة كان عن طريق اكتشاف نفسهم. أنت رقيب على نفسك وعندك طاقات ومواهب لازم تكتشفها وتوجهها صح. طب إزاى؛ انكش نفسك.

شوف أكتر حاجة بتفرحك لما تعملها بتخليك إيجابي ومبسوط، الحاجة اللي تقدر تشيل من جوالك نصف تعبك أو وجعك أو تضيف لقلبك سعادة؛ امسك فيها، مارسها بانتظام.

بس أنا مش عارف، لازم تجرب لو عشت طول عمرك بتجرب تعمل حاجات تبسطك هتكون أسعد حالاً من لو مجربتش إنك تكتشف نفسك.

ابدأ شوف ميولك، ركز في الحاجات اللي بترفع معنوياتك وتنسى فيها نفسك وتخليك تنفصل عن العالم، هي دي اللي تبدأ بيها. لو أنت مبدع بجد تصر على حاجة أو اتنين تمارسهم، بس ثابر واصبر وقاوم بيهم وفيهم ملل الدنيا.

طب ليه كل ده؟ ببساطة هتعيش أحسن وأسعد، هتحس بقيمتك لأنك قدرت نفسك. منظورك للحياة هيختلف خالص. أصل أنت وأنت مطحون ومشغول ومسئول قدرت تفرح نفسك وده بيخلي نَفَسَك في الدنيا أطول.

إحنا في دار ابتلاء، يعني عمر ما الدنيا هتمشي على مزاجك، والأغلب تنقصك حاجات مهمة أوي أنت محتاجها بس لازم تنجح بتفوق. يساعدك على ده إنك تسند نفسك بشيء يخرج طاقتك السلبية ويساعدك تتجاوز عثرات الدنيا أسرع.

الدنيا بيهون وجعها عليك بالطبطبة، أنت طبطب على نفسك بنفسك. لآخر يوم في عمرك خليك موجود، حاضر ومنتبه؛ اكتشف حلويات روحك وخرجها براك أسعد بيها وخلي السعادة دى تعدي على غيرك من خلالك.

فكرة إنك تبقى شخص مفيد وإيجابي أكتر فكرة ناجحة في الوجود. ابذل مجهود يخليك راضِ عن نفسك وعيشتك وتأكد كله بيرجع لك.

تعدد مواهبك وقدراتك بتخليك ثابت وأنت واقف؛ مبتعياش لما الدنيا تبَّرد حواليك.

الناس اللي عايشين فى جو مثالي بيمارسوا رياضة طول السنة واللي بلادهم صقيع بيمارسوا التزحلق على الثلوج ويخرجوا طاقتهم، ناس بترسم وتدخل معارض وغيرهم يدبروا نفسهم بيسافروا ويكتشفوا الدنيا. اتعلم طبخ، رسم، حِرفة، مشغولات، لغات، تتفنن في إسعاد نفسك.

أنت بقى عملت إيه لنفسك؟ قبل ما تجاوب على السؤال بس تأكد إن إجابته هتبقى درجة سعادتك.