أنت مش واقف على رجلك أنت واقف على قلبك، فعلى قدر وسعه قلبك حاتنور وينور مشوارك.

أقدامك حاتوديك ماطرح ما تحب لكن قلبك حايوصلك المكان اللي المفروض تكون فيه، فرق كبير بين أن ترى وأنت تمشي أو تُساق وأنت لا تدري.

طول الطريق حاتقابل أصناف من الناس فيهم الحنين وفيهم اللئيم ... ماتخافش من الطريق قلبك الحلو هو نجاتك الوحيدة.

خلي الرحله تستحق إنك تحكيها. 

ناس كتير جدا عاشوا وطولوا بس حياتهم مافيهاش وقفات ولا سنْدات معندوش قصه كفاح زي ما دخل بيخرج ... أوعى تكون من دول.

ربنا لما خلقك إداك فرصه علشان تكون إنسان جميل وجمالك ده معياره الوحيد تعلق الناس بيك، أد إيه أنت متشاف ومتقدر وفيه حبايب تحتاجلك. 

أنت محتاج تبقي حلو وتفّرَح نفسك عمرك ماحاتفتخر بنفسك لو كنت قُليل. لجم روحك أضف جمال ورقي لقلبك، إفرح بالطيبه اللي ربنا خلقها جواك، كترها ونقحها خليك أفضل نسخه من نفسك. أنت كبير بحبايبك، كبير بسعه صدرك عظيم برحمتك وخالد بالأبيض اللي بيلون قلبك.

عيش أد ماتعيش، عمرك مابيتحسبش إلا بعدد اللي فرحتهم، اللي من غير مايقولوا سندتهم، الطيبين اللي نورت حياتهم ومن غير تكلف طمنتهم. أنت رصيد المحبه اللي زرعتها في قلوب كل اللي مريت علىهم. أنت النعمه اللي ربنا خلقها تمشي على الأرض، لك وظيفه اتخلقت عشان تعملها وهدف لازم توصله ومحبه لازم تكافح وتزرعها وتستناها تنبت وتطرح.

أوعى تكون فاكر إن حياتك حاتبقى سهله، أبدا أبدا بس افتكر إن  على قد مشقه الرحله بتكون حلاوه الوصول.

الطريق الوعِر قلبك ينوره والرفيق الخَشِن حُبك يلينه بس سلامه الوصول دايما حاتقف على كم الأمن اللي قدرت تزرعه في نفوس حبايبك.

طول عمري باشوف إن أفضل معيار أطمن بيه للناس هي قلوبهم.

كلنا عندنا جوانا حد بيقولنا إمتي نقرب وإمتي نبعد وإزاي نصبر وإمتي نمشي من غير ما نفكر. فكر في نفسك زي غيرك وضبط علاقاتك مع ناسك واتسند جوه حبايبك.

المهم زي ما بتفكر في غيرك ماتنساش نفسك واعتبر نفسك واحد من حبايبك عشان أنت طيب وجميل وتستحق المحبه وتستاهل تشوف نفسك في أفضل مكانه ليها.

خليك دايما مع الحلويين اللي زيك الناس اللي تتطمن معاهم واللي صباحاتك بتحلو لما تشوفهم.

ناس كتير فاكره إنك مجبور على إختياراتك المفاجأه الحلوه إنك في إيدك معظم حلاوه الدنيا بس أنت اتعودت ماتبصش علىها. أنت أحلي حاجه في دنيتك أنت اللَبِنَه الخصبه اللي بتنمو علىها معظم سعاداتك.

اشتغل على نفسك نميها وبمياه الصبر تنَدِيها.

حط روحك في المكانه اللي بتحلم توصلها. أصلك اتخلقت كريم واتربيت بحب، خليك على قد التربيه اللي بذلوها فيها أهلك وخليك دايما في أفضل موضع يشوفه فيك ربك.

طول عمرك حاتفضل تغلط وتقع، بس حاتقوم فورا وتلملم شتات نفسك، أوعي تنسي نفسك ماتنامش عنها، ربيها النهارده عشان ماتخليش الزمن يجي علىها أو ينفيها. أنت الزمن لنفسك.

أنت القائد لقلبك وأنت الأمل المفرح لغدِك المُشرق.

لما كنت صغيرة دايما كنت باقلق من نظره الآخرين ليا ولكن بمرور العمر اتعلمت إني الوحيدة المطالبة بإزاي أنت تشوفني حلوه.

أنا صانعه نفسي مؤثره في قَدَري أهتم بمنحنيات روحي أنا الثقه بالنفس التي تراها إذا مررت بي، وأنا فيض السعاده والرضا إذا جلست تتحدث مع قلبي.

المهم ... قضّي وقتك وأنت بترتقي عشان زي ما يزيد عمرك يرتفع قدرك وتسمو روحك وتخرج من الدنيا أفضل إصدار من نفسك.

خلي قلبك حلو واصبر وادعي ربنا يحطلك الدنيا دايما في إيدك مش في قلبك.