أثارت كلمة الفنان المصري بيومي فؤاد، التي ألقاها عقب انتهاء مسرحية "زواج صناعي" في السعودية، انتقادا وهجوما كبيرا من المصريين، خاصة بعد مهاجمته زميله الفنان محمد سلام، الذي رفض السفر للسعودية لتقديم المسرحية في ظل الأحداث التي تشهدها فلسطين.

أشار بيومي في كلمته، التي هاجم فيها الفنان محمد سلام بدون ذكر اسمه، إلى أن من حق الفنان أن يعتذر عن عدم المشاركة في العمل ولكن ليس من حقه أن يغلط في فنه.

وجاء نص تصريحات بيومي فؤاد، والتي ردد بعضها باكيا، على النحو التالي:

- بنشكر دعمكم وبنشكر مساندتكم لأنور ولينا أنا فنان مصري وليا الشرف

- اسمحولي أشكر معالي المستشار تركي آل الشيخ لوقوفه الدائم جانبنا، وأشكر الدكتور راكان وكل رجال صلة وعلى رأسهم صديقي عدنان الكيال، المسرحية إنتاج اتنين لسه مقبضوناش لحد دلوقتي محمد نصار وصلاح الجهيني، تأليف وإخراج عيل ولا له لازمة محمد محمدي.

- جيت المملكة العربية السعودية وليا الشرف عشان نقدم فننا، مش جايين نضحك احنا جايين نقدم فننا، احنا بنحترمكم وانتم بتحترمونا.

- شيء عظيم إن الفنان يكون له جمهوره في كل الدول، شيء عظيم إني أخرج اتصور مع شاب سعودي أو سيدة سعودية وهي تعلم اني مصري أنا بشرف بلدي.

- من حقك انك تعتذر عن المسرحية لكن مش من حقك انك تغلط في فنك، إحنا مش بنيجي عشان نضحك إحنا بنقدم فننا المصري، انتوا بتحترمونا واحنا بنحترمكم جدا.

 أنا وكل زملائي بنحترمكم وبنحبكم وهنفضل طول عمرنا معاكم، كتر خيركم.

- إحنا بنقدم فن بنتعب ونشقى عشان نقدم فن مش عشان نيجي نضحك، لو الموضوع كده يبقى فيه فنانين من أيام نجيب الريحاني لحد محمد أنور المفروض ينتحروا، احنا بنقدم فن تحياتي لحضراتك أنا آسف.

- أقسم بالله احنا مش بتوع فلوس والله العظيم مش بتوع فلوس، العرض ده لو قعد 15 يوم تاني بدون أجر، سيادة المستشار يعلم احنا يبقى لينا الشرف ونبقى فرحانين جدا، تحياتي لحضراتكم وأنا آسف.

- إحنا اتظلمنا واتهانا واحنا جايين نقدم فن.

محمد أنور بديل محمد سلام في المسرحية

وحل الفنان محمد أنور بالمسرحية بديلا عن الفنان محمد سلام، وعرضت المسرحية يوم الاثنين الموافق 30 أكتوبر الماضي، على مسرح محمد العلي في الرياض.

مسرحية "زواج اصطناعي" تدور أحداثها حول زوجان يتعرضان لأزمة في ليلة زفافهما، ويضطران للجوء لخبير في العلاقات العاطفية، ثم يجرى لهما تجربة حديثة بواسطة الذكاء الاصطناعي، تجعلهم يعيدون التفكير في مشروع زواجهما بالكامل.

"زواج اصطناعي" بطولة مي عز الدين وبيومي فؤاد ومحمد أنور، إيمان السيد، دنيا سامي، وعدد من الفنانين.

هجوم المصريين على بيومي فؤاد

‏ولاقت كلم بيومي هجوما من المصريين، حيث قال أحدهم على "فيس بوك": "هو السؤال الاساسي انت ليه اوفر كده!. يا عم اصلا الناس اللي رايحة تتفرج عليكم لو سألتهم هيقولوا احنا جايين نضحك على اللي بيتقدم مش اكتر. انت ليه مجعلصها كده ع الفاضي!".

وأضاف أخر: هو التصريحات دي لوحدها اكيد بتضحك اكتر من المسرحية يا نجم"، وأكمل أحد رواد التواصل الاجتماعي تعليقه على الفيديو قائلا: "اللي هقدر هقوله في الموضوع ده. الفتنه أشد من القتل منه لله الي كان السبب".